Krusada sa Pagrosaryo og Paghalad

Sa umaabot nga Sabado Agosto 22, 2015 saulogon na usab sa tibuok Simbahan ang Paghandum sa Pagka Rayna sa Bulahang Birhen Maria. Sa Diyosesis sa Digos, ika-64 nga kapistahan kining adlawa sa Mary Mediatrix of all Grace Cathedral. Viva Maria, Viva Jesus!

Kining kapistahan karon makahuluganon kaayo tungod kay sa maong adlaw ilunsad dinhi sa habagatang Mindanao, ang Krusada sa Pagrosaryo ug Paghalad alang sa katumanan sa katuyuan sa Movement for the Dogmatic Definition of Mary’s Universal Mediation of Grace.

Kining maong kalihokan gipangunahan sa pipila sa atong mga obispo sa Pilipinas uban sa mga deboto sa Mary Mediatrix of all Grace. Kini ang mga nangunang mga obispo: Ricardo Cardinal Vidal, (Cebu) Archbishop Jose Palma, (Cebu) Archbishop Angel Lagdameo, (Iloilo) Bishop Camilo Gregorio, (Batanes) Bishop Colin Bagaforo, (Cotabato) Bishop Antonio Ranola, (Cebu) ug ako, Bishop Guillermo D. Afable (Digos).

Gipasiugdahan namo ang pagbuhi ug pagpadayon sa susamang kalihokan nga gihimo kaniadto pang mga tuig 1920, pinanguluhan ni Joseph-Desire Cardinal Mercier ug ang mga obispo sa Belgium.

Ang tumong sa maong kalihokan mao ang paghangyo sa Santo Papa nga i-deklarar nga Dogma, ang daan ug dugay nang gitoohan ug gidawat sa daghang mga magtotoong katoliko, bahin sa mapangamuyong tigpataliwala sa Mahal nga Birhen Maria ngadto kang Jesus, kinsa mao lamang ang bugtong tigpataliwala tali sa Dios ug sa tawo.

Gisuportahan ang ilang kalihokan kaniadto sa daghang mga obispo nga miapil og mipirma sa petisyon, sama sa tanang mga obispo sa China. Ang duha ka inilang obispo sa Pilipinas kaniadto, si Arsobispo Alfredo Verzo sa sa Lipa ug si Obispo Juan Bautista Gorordo sa Cebu, miapil usab sa pagpirma sa petisyon, kauban ang Apostolic delegate sa Pilipinas kaniadto nga si Obispo Guglielmo Piani. Usa sa mga bunga sa maong kalihokan mao ang gitugot ni Papa Benedikto XV nga liturhiyanhong pangilin sa Mary Mediatrix of all Graces niadtong 1921.

Sa ulahing 50 ka tuig sa miaging ika-20 nga siglo sa kasaysayan, nasaksihan ang pagkaylap sa debosyon sa Mary Mediatrix of all Graces sa tibuok kalibutan. Pinasikad sa mga misteryosong katuyuan sa Dios, ang maong debosyon nahimugso usab dinhi sa Pilipinas. Nag-una didto sa Lipa, Batangas. Misunod dinhi sa Digos ug Kidapawan, diin niadtong dekada 50 pa, ang ilang Katedral gihimo si Maria, ubos sa maong titolo, isip Patron, ug nakatabang sa pagpaila ug pagpamahal kaniya ubos sa maong ngalan.

Sa pag-abot sa ika-3 nga milenyo, miusbaw pa gayud ang pagkaylap ug pagdawat sa debosyon sa Mary Mediatrix of all Grace. Naa nay gipahigayon nga National Marian Pilgrimage matag Setiyembre 12, didto sa Lipa, Batangas. Duna nay petisyon ang mga obispo sa Pilipinas nga iapil sa kalendaryo sa mga liturhiyanhong pangilin ang Mary Mediatrix sa petsa 12 sa Setiyembre. Ang mga nagkalainlain nga Marian Conference nakatabang usab sa dugang pagsabot ug paghatag bili sa pagpataliwala ni Maria sa Grasya.

Busa, gitoohan sa nangunang mga obispo sa maong kalihokan, nga panahon na nga buhion ug padayonon karon, ug magsugod dinhi sa Pilipinas, ang nasugdan na kaniadto dito sa Belgium. Ug kita nga taga Digos, natural lamang nga usa sa mga mangunay niini.

Alang niining tinguha, gipasiugdahan ang Krusada sa Pagrosaryo ug Paghalad — ang mga magtotoo sa Simbahan, sugod dinhi sa Pilipinas ug hangtud ngadto sa tanang kanasuran, maghiusa nga mag-ampo alang sa katumanan sa katuyuan sa kalihokan. Ubanan kini sa kinasingkasing nga pagtugyan sa kaugalingon ngadto sa Ginoong Jesus pinaagi ug uban kang Maria, ang Rayna sa langit ug yuta, pinasikad sa pagtulun-an ni Santo Luis Grignon de Monfort.

Akong pagampo, hangyo ug pagawhag, nga ang tanang hut-ong sa atong Diyosesis sa Digos — mga Kaparian, mga Relihiyosong lalaki ug babaye, ug mga Laykong magtotoo, ilabi na ang mga organisadong mga pundok sa Simbahan sama sa mga Catholic Schools, mga GKK ug mga lay movements, magmadasigon sa pagawhag sa tanan sa pagsuporta ug pag-apil niining Krusada. Gihangyo ko ang mga Marian associations ug religious congregations nga maoy mahimong primary promoters didto sa mga dapit diin sila namuyo ug nangalagad.