Agila nga nadakpan, gibuhi-an ug balik sa kalasangan

Human sa 37 ka adlaw nga pag amuma, gibuhian ug balik sa kalasangan sa Tibolo ug Sibulan, Sta. Cruz, Davao del Sur ang usa ka nadakpan nga Pinker’s Hawk Eagle niadtong Oktubre 14.

Ang agila nagpangidaron ug tres anyos ug ginganlan kini ug “Mabikker”, usa ka pinulungang bagobo nga buot pasabot kusgan ug gamhanan. Si Mabikker nakita sa usa ka mag-uuma nga taga Tudaya nga si Bernie Apal nga luya na ug dunay deperensya sa panglawas partikular ang usa ka mata niini niadtong Septembre 7 didto sa sapa sa Tomari, Sibulan, duol lamang sa planta sa HEDCOR.

Ang HEDCOR, diin nanag-iya ug hydro-power nga planta sa Sta. Cruz, dali nga niresponde ug gidala ang agila sa usa ka wildlife veterinarian sa Davao City nga si Dr. Bo Puentespina. Hinanali usab nga gihatagan ni Dr. Bo ang agila ug insaktong medikasyon. Matud pa ni DENR Officer Ed Ragaza, ang Pinker’s Hawk Eagle usa na sa mga endangered ug threatened species ug kasagaran sa mga kaliwat niini makita lamang sa kalasangan sa isla sa Mindanao. (Julius Paner | Sta. Cruz)