Aduna bay purgatoryo?

Ang “PURGATORYO” gikan sa espanyol nga pinulongan nga purgatorium ug sa latin nga purgare, buot pasabot linisanan. Usa kini ka temporaryong lugar silotanan alang niadtong mga kalag sa tawo nga namatay nga aduna lama’y gagmay’ng sala o venial, ug para usab sa mga kalag nga namatay sa grasya sa Dios apan wala pa sila makabayad sa tuman sa ilang kaugalingon nga utang sa Diosnong hustisya o katarungan.

Ang tawo maghinolsol, mangumpisal aron madawat ang kapasayloan sa sala, pero kinahanglan pa siya moagi sa hustisya sa Dios (Salmo 7:11), aron mobuhat ug pagbayad ug pagtul-id sa iyang dautan nga nabuhat. Ug aron mabayran kini kinahanglan nga moagi kita sa PURGATORYO. Sama pananglitan nga nakapatay o nakapangawat kita, kini dako nga sala batok sa Dios, ning-abot ang higayon nga nagbasol kita sa maong binuhatan, naghinolsol ug nangumpisal ug nadawat nato ang kapasayloan, apan aduna pa kitay bayaran ang kadaut o damage nga atong nabuhat, mao nga samtang buhi pa kita ato kining pagabayran pinaagi sa dili na pagbuhat niini ug pagpabilin sa pagbuhat ug maayo, pag-ampo ug pagsimba sa kanunay.

Apan kung maabtan kita sa kamatayon ug wala pa nato kini mabayri sa husto mao nga dili pa kita malangit ug i-agi pa kita didto sa PURGATORYO aron sa paghinlo kanato (1 Cor. 3:15), kay sumala pa sa kasulatan nga walay makasulod sa langit bisan aduna kay tulpok lamang sa sala (Pinadayag 21:27), sama usab nga nakabuhat ka ug gamay nga sala lamang o gitawag sa Simbahan nga benyal (venial sin), ug maabtan kita sa atong kamatayon nga wala pa kita kahinolsol ug nakakumpisal mao ng i-agi usab kita didto sa lugar nga linisanan o purgatoryo (Mateo 5:26). Busa ang Purgatoryo usa ka tunga-tungang kahimtang alang sa mga kalag nga giandam para malangit apan gikinahanglan pa nga hinloan o linisan sa purgatoryo.

Diha sa Balaang Kasulatan o Bibliya dayag kining gitudlo, nasayod kita nga ang IMPIYERNO usa ka lugar nga kastigo niadtong mga tawo nga nagbuhat ug dautan nga dili maghinolsol, gani nagdumili sa pagsunod ug pagdawat kang Kristo (Pin. 20:10, 1 Cor. 6:9-10).

Nasayod usab kita nga si Ginoong Jesukristo nagapahayag usab nga adunay sala nga mapasaylo pa sa sunod nga kinabuhi dinhi atong mabasa sa Mateo 12:32: “ang nagsulti’g dautan batok sa Anak sa tawo mapasaylo, apan ang magsulti’g dautan batok sa Espiritu Santo dili gayud mapasaylo karon ug bisan kanus-a,” sa ingon niini atong masabot nga adunay sala nga mapasaylo pa sa laing kinabuhi ug kining kahimtanga dili kini impiyerno, kay ang impiyerno wala nay kagawasan (Pin. 20:10).

Ang Simbahan mitawag niini nga kahimtang nga Purgatoryo, diin usa ka dapit nga dili dumalayon sa kalag-lagan aron maandam sila sa langit human mapasaylo didto. Si San Pedro ug San Pablo mipamatuod usab niini nga kahimtang o lugar nga Purgatoryo. Sa 1 Pedro 3:18-19: “si Kristo namatay sa makausa lamang…ug sa iyang espiritohanong kahimtang miadto siya ug nagwali sa mga espiritu nga nabilango.”

Si Kristo sa iyang espiritohanong kahimtang miadto sa mga espiritu nga nabilanggo ug iyang giwalihan. Dili kini langit kay ang langit dili bilanggoan kondili puy-anan sa mga tawong luwas na ug dili na kinahanglan pang walihan ug dili usab kini impiyerno kay didto ang kalag nakatagamtam na ug silot ug wala nay kaluwasan, busa dili kini langit ug dili usab impiyerno kining lugara gitawag sa atong Simbahan ug Purgatoryo, kahimtang nga angay pang linisan nga may kagawasan pa ug sa 1 Corinto 3:15: “si San Pablo adunay gihisgutan nga usa ka lugar ug kahimtang nga kalayo ug ang maka-anhi dinhi aduna pay kalingkawasan ug kining kahimtanga dili kini langit kay walay kalayong pag-antos didto, kondili lonlon kalipay na, ug dili usab kini impiyerno kay ang kalayo nga gihisgutan ni San Pablo aduna pay kalingkawasan, ug sa impyerno wala na, busa sa mao gihapon nga rason ang Simbahan mitawag niini ug Purgatoryo o lugar linisanan. Bisan pa sa Daang Tugon sa kasulatan mipamatuod usab nga dunay gayo’y Purgatoryo sa 2 Macabeo 12:43-45: “nagpaamot usab siya gikan sa tanang niyang mga tawo ug mikabat ug 2,000 nga salapi nga plata aron ihalad sa mga pag-ampo alang sa sala… kay nagtoo siya sa pagkabanhaw… usa kini ka lig-on ug Diosnon nga hunahuna aron malingkawas sa ilang mga sala sila nga nangamatay”. Ug karon dinhi atong masabot nga ang katawhan sa Dios sukad kaniadto aduna nay paghalad ug pag-ampo sa mga nangamatay ug kini ilang gi-ampoan ug gihalaran dili kini ang nalangit ug na-impiyerno kay wala na sila nanginahanglan sa atong mga pag-ampo ug paghalad, kondili kanang kahimtanga mao gayud ang Purgatoryo. Busa ang Purgatoryo anaa ug masabot gayud nato diha sa Bibliya kay ang Purgatoryo timaan sa gugma ug hustisya sa Dios.