Ang Pagka-Inahan sa Dios ni Birheng Maria

Bag-ohay lang natapos ang atong pagsaulog sa Pasko sa pagkatawo sa atong Ginoo ug mosulod napod ang Bag-ong tuig 2016, uban sa panghinaut nga unta mas ato pa gayong palaloman ang atong pagtoo ug pagsimba sa Dios nga maoy naglalang kanatong tanan. Ug karong January 1 ang tibook Simbahan sa kalibutan nagsaulog usab sa dakong kapistahan ang SOLEMNIDAD SA PAGKA-INAHAN SA DIOS NI BIRHENG MARIA. Kini nga kasaulogan mao ang liturhikanhong kapistahan ni Birheng Maria sa matag unang petsa sa bulan sa Enero, human sa adlaw sa paghandom sa pagka-tawo sa atong Ginoo. Usa kini ka adlaw nga ang tanang magtotoo mosimba gayud niini o holy day of obligation. Kini nga solemnidad sa pagka-inahan sa Dios ni Birheng Maria mao ang Diosnon ug putlianon nga pagka-inahan niya diin kini mao ang nag-inusarang makaluwasnong panghitabo; para sa atong Langitnong Inahan kini usa ka pagtilaw ug hinungdan sa iyang talagsaon nga himaya; ug alang kanato kini mao ang tinubdan sa grasya ug kaluwasan kay tungod kaniya kita nakadawat sa tag-iya ug magbubuhat sa kinabuhi. Si Birheng Maria mao ang inahan ni Jesus (cf. Mateo 1:23), ug si Jesus matuod nga Dios ug Matuod nga Tawo (Tito 2:13, Roma 9:5, Filipos 2:6, Heb. 1:8 ug 1 Juan 5:20). Ug mao kini ang opisyal nga tudlo sa atong Simbahan “Mary, Mother of God – Catechism of the Catholic Church, CCC # 495. Called in the Gospels “the Mother of Jesus,” Mary is acclaimed by Elizabeth, at the prompting of the Spirit and even before the birth of her son, as “the mother of my Lord.” In fact, the One whom she conceived as man by the Holy Spirit, who truly became her Son according to the flesh, was none other than the Father’s eternal Son, the second person of the Holy Trinity. Hence the Church confesses that Mary is truly “Mother of God”. Busa ang Simbahan dayag nga nagtudlo kanato nga si Maria Inahan gayud sa Dios.Kita nasayod nga ang Dios wala gayo’y inahan diha sa iyang pagka-sugod o eternidad. Apan sa dihang ang Anak sa Dios nga si Jesukristo, ang ikaduhang Persona sa Santisima Trinidad nahimong tawo ug gianak ni Birheng Maria (Mat. 1:23), nahimo siyang Inahan diha sa pagkatawo sa Dios (Juan 1:1,14). Sa dihang moingon kita nga si Maria Inahan sa Dios, diha-diha dayon motongha ang mga pagsupak nga nagkanayon naunsang pogka-unsaa nga ang Dios nga walay sinugdanan aduna man hinooy Inahan? Ang pagka-Inahan sa Dios ni Maria adunay halawom nga kalabutan sa pagkatawo sa Anak sa Dios nga si Jesukristo. Diha sa pagka-Diosnong Inahan ni Maria, wala magpasabot nga nahiuna siya sa Dios o siya ba hinoon ang nag-anak sa pagka-Dios, kondili ang Anak sa Dios ang ikaduhang Persona sa Santisima Trinidad nga mao si Kristo mikuha ug unod ug dugo kang Birheng Maria nga maoy nakapahimong tawo kaniya, kay si Kristo Dios ug Tawo nga matuod ug ang tibook nga Persona ni Kristo maoy gisabak ug gianak ni Birheng Maria. (Galacia 4:4, Lucas 1:31-32 ). Ug dugang pang pagpamatuod sa Balaang Kasulatan diha sa ebanghelyo ni San Lucas 1:43 si Santa Elizabeth mitawag kang Maria nga Inahan sa Ginoo (ang pulong Ginoo nga maoy gigamit ni Santa Elizabeth pagtawag kang Maria sa henebreyo nga pinulongan Adonai-nagpasabot ug Ginoong Dios) tukma kini sa atong pagsangpit kaniya sa pag-ingon Santa Maria, Inahan ka sa Dios. Si Jesukristo usa ka balaan nga Persona ug kini nga Persona usa ka Dios, ug si Birheng Maria Inahan ni Jesukristo (Buh. 1:14), busa si Maria angayan gayud nga tawagon ug Inahan sa Dios. Ug sa ikatulo nga konsilyo sa Ephesus sa tuig 432 AD ang Simbahan ni Kristo solemning miproklamar sa pagka-Inahan sa Dios ni Birheng Maria o THEOTOKOS, ug sukad kaniadto ug karon kanunay kitang nagadayeg ug naga-ampo kang Birheng Maria isip Inahan sa Dios.