Pagtambayayong alang sa E-Champ 2016 sa Simbahan ug DACS Palig-onon

Dugang pagpalig-on sa collaboration tali sa Davao Association of Catholic Schools (DACS) ug sa Arkidayosis ug mga Diyoseses sa rehiyon sa Davao ang pagahimoon sa mosunod nga mga adlaw alang sa usa ka limpiyo, matinud-anon, sakto, mahinungdanon ug malinawon nga eleksiyon.

Kini maoy gihisgutan sa unang panagtagbo sa Archdiocesan Social Action Center (ASAC) Davao ug sa DACS isip pagpangandam alang sa nasudnong piniliay karong Mayo 2016.

Unang gituki ni ASAC Director Fr. Leonardo Dublan, Jr. ang kabahin sa mga rekursos ug suporta alang sa pagpahigayon sa voters education, tabang alang sa mga mo-boto nga adunay mga kakulian sa panglawas, mga tigulang ug ang pagtabang sa mga botante sa pagpangita sa ilang mga pangalan panahon sa eleksiyon.

Gipresentar usab ni ECHAMP Project Director Fr. Archimedes Lachica, SJ ang mga nahan-ay na nga mga plano alang sa pagtubag sa mga isyu sa pagpahigayon sa maong boluntaryo nga kalihukan.

Gitakda nga i-presentar usab ngadto sa mga kaparian sa Dayosis sa Mati, Tagum ug Digos ang maong proyekto sa umaabot nga Enero 18, 26, ug Pebrero 9 atol sa ilang tagsa tagsa ka mga presbyterium.