Move on

(Editor’s Note: Kini ang pipila ka mga punto nga gipaabot sa atong mahal nga Arsobispo sa Davao, Archbishop Romulo G. Valles, D.D., atol sa binulan nga Presbyterium meeting didto sa Mergrande Ocean Resort niadtong milabay nga Marters, Mayo 10.)

Karon nga bag-o pa lamang nahuman ang atong piniliay, magpasalamat kita sa Ginoo sa gipahigayon nga eleksiyon tungod kay ubay-ubay gayod ang mipartisipar niini. Isip mga magtotoo, katungdanan usab nato ang pagmahal sa atong nasud. Kinahanglan nga mag-move on na kita. Paningkamutan ta ang paglihok sa pakighiusa.

Pinaagi sa atong mga E-CHAMP volunteers nga gipanguluhan sa atong mga eskwelahang Katoliko sa Davao nga sakop sa Davao Association of Catholic Schools (DACS) ug sa atong mga volunteers gikan sa lain-laing mga parokya sa DADITAMA, ang mga Simbahang lokal dinhi sa lalawigan sa Davao milambigit ug mitampo sa kalampusan ug kalinaw sa maong piniliay. Magpasalamat kita sa mga kura paroko, sa mga school heads ug sa tanang volunteers sa E-CHAMP.

Dinhi sa atong Archdiocese sa Davao, duna kitay duha ka mga diakono. Ang usa niini mao si Rev. Matt Quiao ug ang usa si Rev. Zeus nga bag-o lamang naordinahan ug karon atoa pa didto sa Espanya. Duna usab kitay duha ka mga seminarista nga nangandam na sa ordinasyon sa pagka-diaykono. Kining duha mao sila Eman Calumpong ug si Chris Alcayde.

Karong umaabot nga Hunyo 12, Independence Day sa atong nasud nga Pilipinhon, himuon nato nga talagsaon kining maong pagsaulog. Kanunay man nga espesyal ang Misa apan niining adlawa angayan nga aduna kitay gimmick ug pakulo sa atong mga kasaulogan. Mahimo usab nga magtaod kita ug mga flag. Angayan lamang nato nga ipadayag ang atong pagmahal sa atong nasud nga Pilipinhon. Dasigon nato ang matag-usa sa diwa sa patriotism.

Ato usab nga hatagan ug pagtagad ang bag-ong Apostolic letter ni Santo Papa Francisco mahitungod sa kinabuhi sa pamilya. Ang kalipay sa gugma (Amoris Laeticiae) iyang gihatagan ug bili ang kaimportansiya sa tinuoray nga paghigugma diha sa Kristohanong pamilya. Apan ang Santo Papa mismo miingon nga dili nato kini dali-dalion. Ang pagpamalandong sa iyang pahimangno ug ang pagpalambo sa Kristohanong pamilya moagi sa inanay nga proseso uban sa maampuon nga kinaiya.

Isip Simbahang lokal sa Davao, atong himuon ang tanan alang sa kahiusa ug kalamboan sa kinatibuk-ang kinabuhi sa matag magtotoo.