Campus Ministry sa mga tulunghaang publiko

Magasugod na ang SY 2016-2017. Malipayong pagsugod sa atong mga tigdumala, mga magtutudlo ug mga estudyante, mga ginikanan, sa atong mga tulunghaang publiko ug pribado. Sulod sa 10 na usab ka bulan, magkatinabangay na usab kamo sa paglambo sa kaalam ug kamauhan alang sa mabungahon ug mapuslanong kinabuhi sa mga batan-on.

Makasaysayan kining maong SY 2016-2017 tungod kay magsugod na ang bag-ong K-12 nga programa sa Edukasyon sa atong nasud. Anadam na o dili, magsugod na. Dugang duha ka tuig sa High School. Dugang higayon sa pagtubo sa kaalam ug kinaadman.

Salamat sa pagtugot ug pagsuporta sa Dep-Ed sa tinguha sa Simbahan nga makaapil sa program sa tulunghaan diin gitagaan og luna ang Religious Instruction alang sa tanang tinuohan nga gusto ug andam mohimo niini.

Nakapangandam na unta ang atong mga parokya alang niining dakong kahigayunan nga gihatag kanato, ilabi na ang gikinahanglan kaayo nga Campus Ministry alang sa mga batan-on sa high school ug sa kolehiyo. Hinumduman nato nga ang kadaghanan sa mga batan-on nga Katoliko anaa sa mga tulunghaang publiko. Busa dakong pagkulang sa Parokya kon wala siya nagapahigayon niining Campus Ministry.

Kabahin sa Youth ministry

Sumala sa Kalakbay, (ang tamdaanan sa Simbahan alang sa Youth Ministry), ang Campus Ministry kabahin sa Youth Ministry. Sa ato pa, nadugtong ug nahiusa kini sa lain nga programa sa Simbahan labot sa mga kabatan-onan – ang Family and Life, sa mga GKK, sa mga renewal movements, sa mga tulunghaan sa Simbahan, Liturhiya, ug Social Ministry.

Ang off campus ministry kinahanglan mapahigayon usab ilabi na sa mga panahon nga dili tingskwela – sa adlaw sabado ug dominggo, sa semestral nga bakasyon, sa Kapaskuhan, ug sa summer vacation.

Dako nga ikatabang alang niining campus ug off campus nga programa alang sa mga batan-on ang pagkaanaa sa klaro nga mga youth ministers boluntaryo man o full time. Kinahanglan nga masuportahan sila og mga kahimanan alang sa pagtuman sa ilang kaakuhan. Makatabang tingali nga dunay Youth Office o Youth Center sa parokya. Pinaagi niini makita gayud nga seryoso ang Simbahan sa ilang youth minstry.

Malangkobong Pagtagad

Magkulang ang Campus Ministry kon ang mga estudyante lamang ang tagdon. Ang mga tigdumala usab ug magtutudlo kinahanglan matagaan usab og mga higayon nga molambo usab sila sa ilang tagsa-tagsa ka tinuohan.

Dili ikalimod, nga dakong bahin sa kahimtang sa mga estudyante adunay kalabutan sa kahimtang sa ilang pamilya. Ilabi na ang ilang mga ginikanan. Busa kinahanglan usab matagaan og pagtagad ang mga ginikanan ug mga kapamilya.
Idugtong sa off campus ministry

Kinahanglan ang pagtinabangay sa mga ministriya

Ang gidaghanon sa mga batan-on sa parokya dako kaayo. Nagkinahanglan sa daghanh mga lumilihok. Tungod sa dakong panaglambigit sa nagkadaiyang mga tawo nga apil sa Edukasyon sa mga batan-on, nagkinahanglan ang pagtinabangay ug pagkadugtong sa mga nangalagad sa mga kabatan-onan. Kinahanglan nga magkauban sa paglingkod ug pagplano sa mga kalihokan ug magmonitor sa dagan sa programa.

Kinahanglan usab nga magkasinabtanay ug magkatinahuray ang lainlain nga ministro sa sa ilang paningkamot alang sa ilang tagsa tagsa ka ginsakpan nga batan-on diha sa Campus. Sa ingon, maktabang sila sa kahusay ug kalinaw diha sa Campus.

Busa, mapuslanon nga maayo ang organisasyon ug koordinasyon sa tanang grupo nga may kalabutan sa paguban ug pagumol sa mga batan-on. Ang pagpasiugda ug pagdumala sa Kura Paroko ug iyang kabulig alang niini, labing kinahanglanon kaayo.

Niining Labaw pa sa Ordinaryong Hubileyo sa Kalooy, sa SY 2016-2017, madugangan pa unta ang atong panlimbasog aron molambo pa ang atong Campus Ministry. O Santissima Trinidad, Amahan, Anak ug Spirito Santo, dasiga kaming tanan, hiusaha kaming tanan alang sa imong kadayganan ug kaayuhan sa among kabatan-onan.