Sr. Santiago Apostol, tinubdan sa bokasyon

Halangdon kina Fr. Roy Mejias, Nonoy Lamata ug Jan Mark Capalla ang pagsaulog sa ika-54 nga kapistahan sa parokya sa Sr. Santiago Apostol sa Bunawan.

Si Fr. Roy Mejias nagtubo sa usa sa mga GKK niini sa San Pedro ug San Pablo. Siya 25 na ka tuig sa pagkapari niadtong miaging Abril 22. Matud niya, ang maong simbahan ang nahimong instrumento sa iyang paghikaduol sa Ginoo.

Si Nonoy Lamata nga igsoon ni Fr. Pete Lamata, migradwar ug BS Architecture sa UM, mao ang kinaunhang “altar boy” niadtong 1954.

Si Jan Mark Capalla, gikan sa Sr. Sto. Tomas de Villanueva GKK, magtutudlo na karon ug Christian Living sa Holy Cross of Bunawan, nakabenepisyo sa “Pagbuak sa Alkansya sa Bokasyon” kaniadtong seminarian pa kini. Nanghinaut siya nga mubalik sa seminaryo human iyang duha ka tuig nga “regency program.”

Silang tulo gimatuto ug giagak sa mga way puas nga nagserbisyo sa parokya.

Simple ang nahimong selebrasyon apan kanilang tulo, ang ilang pagbisita niadtong Hulyo 25 atol sa ika-54 ka tuig nga kasumaran sa parokya labaw pa sa maskin unsang katigayunan sa kalibutan.

Bisan tuod “school day” ang Lunes, wala gihapon mapugngan ang mga estudyante sa Holy Cross Bunawan, GKK servant leaders ug members, center organization officers ug members, kaparian, uban pang bisita, ug mga batan-on nga mipatigayon sa padula ug mga pasundayag human sa Misa.

Ang “Pagbuak sa Alkansya sa Bokasyon” nahimong usa sa labing mahinungdanon nga parte sa kapistahan tungod kay sa pagtinabangay sa 61 ka mga GKK, daghan na pud nga seminarista ang makabenepisyo sa maong pondo. Dinhi usab nga parokya nag gikan sila Fr. Pete Lamata nga naordinahan niadtong Marso 31, 1980, Fr. Florencio Acedo, Jr. nga nagsaulog na sa iyang ika-33 ka tuig sa pagkapari niadtong milabay nga semana, ug ug Fr. Arnold Balaquinto, ang assistant parish priest karon sa Sta. Ana Shrine, nga naordinahan niadtong Hulyo 12, 2007. Ubay ubay sad nga mga madre ang gikan dinhi sama nila Sr. Lorena Labajo, OSB, Sr. Nena Mary Campesiño, SMI, Sr. Bernadette Lagata, HHT, Sr. Maria Margaret Jabique, HHT, ug Sr. Maria Frances Lanos, HHT.