Ang Genesis sa Parokya sa Calinan

Sayo sa 1920, misugod paggitib ang iyang politikanhon, ekonomikanhon, ug relihiyosong kahimtang. Daghan ang mga dayuhan gikan sa Luzon ug Visayas, gani may mga hapon ug intsik dinhi nanimpalad, dinala ang ilang kaugalingong relihiyon ug nakigbayluay og kaminyoon tali sa mga lumad.

Agosto 1927, nahitabo ang unang misa sa Calinan atol sa paghiusa sa kaminyoon nila Ramon Diaz ug Domingga Accos nga gisaulog ni Rev. Onchoco, usa ka pari sa Phil-independent Church (nazario 1991). Tataw kini nga nagapadayag nga sugod niining tuiga hangtod sa ikaduhang gubat misugod ang pagsibol sa mga Kristiyanong katilingban, ma-protestante man o katoliko.

Ang kristohanong komunidad nagsugod sa debosyong pampamilya sama sa “Block Rosary,” Barangay Sang Birhen, Sta. Cruz, Sto. Niño, ug uban pa. Ila kining gipadala sa ilang nataran ug gipaambit sa mga silingan ug nahimong katilingban.

Ang unang kristohanong katilingban sa katolikong pagtuo mao ang katilingban sa Sta. Cruz nga gidumala sa mga pamilyang Nuñez, Peñano, Pelton, ug ang kapilya nahimutang sulod karon sa luna sa Calinan Central Elem. School luyo sa barangay hall. Sa maong kapilya, saulogon ang santos nga misa sa adlaw’ng Dominggo ni Rev. Fr. Octave Rheaume, usa ka PME nga pari. Ang ilang kapistahan sa ika-3 sa Mayo matag tuig.

Human mibusikad ang ikaduhang gubat niadtong 1942, milambo pag-ayo ang iyang kultura, ekonomiya, politikal, ug espiritwal. Ang Calinan maoy nahimong sentrong baligyaanan sa mga dayuhang negosyante ug mag-uuma, ug mao usab kini ang nahimong sentro sa ilang pagsimba ug pasalamat sa Diyos.

Ang tuig 1949 ubos sa pagpaningkamot ni Fr. Octave Rheaume tinabangan sa mga pangulo, nagpasalamat nga nahatagan sila’g luna sa pamilya ni Datu Abeng sa ubos kaayo nga bili aron matukuran og simbahan ug eskwelahan nga mao ang Holy Cross College of Calinan. Sayo pa sa 1950, gibalhin ang katilingaban sa Sta. Cruz dinhi sa lugar sa kumbento. Ug dili na Sta. Cruz ang patron kundili Sagradong Kasingkasing ni Hesus na. Bulan sa Hunyo 1950 gisaulog ang unang kapistahan. Tungod sa ekonomikanhong rason ilang giuswag sa premirong Biyernes sa bulan sa Agosto kay ting-ani ug humay ug mga prutas.

Tungod sa panawagan sa Konseho Vaticano II, 1965 sa iyang dokumento “Gaudeum et Spes” nga natukod ang Basic Christian Community (BCC) ug gibutang sa maong hagit sa Catholic Bishop’s Conference of the Philippines (CBCP) sayo sa tuig 1970. Ug milambo pag-ayo ang parokya ngadto sa pagtukod ug daghan pang mga BCC nga gitawag sa Davao ug Gagmay’ng Kristohanong Katilingban (GKK).

Tingali tungod sa kadugay ug kataas na sa dagan sa panahon ug ang mga tipaka sa iyang kasaysayan nahimo nang kabahin sa atong kinabuhi, mahinungdanon nga sa atong pagsubay sa iyang bulawanong panaw, makahatag kanato’g kadasig sa pagpadayon sa atong panaw sa mga umaabot pang mga katuigan. (Tony Rolloque | Reprinted from 50th anniversary souvenir program courtesy of TMSHP Calinan SoCCom)