Kasaysayan sa Parokya ni Sr. San Roque

Malabog, Paquibato District, Davao City

Dekada singkwenta, ang Malabog puluy-anan sa sa atong mga igsoong Lumad, ang tribu Ata-Matigsalog. Apan pipila ka mga langyaw gikan kabisayaan ug uban pang parte sa Mindanao ang miabot sa Malabog paglabay sa katuigan.

Niadtong Marso 9, 1962, sila Faustino Amora, Nicolas Castino, Leopoldo Ferrarin, Maximo Villarmente, Eduardo Gudito ug Undoy Garcia nagkasabot nga magtukod ug kapilya. Tagsa- tagsa kanila giripa, busa ang Sr. San Roque ang mitumaw nga mahimong patron. Ang kristohanong pundok nahisakop pa sa parokya sa Santa Catalina (sa kasamtangan mao ang St. John the Baptist) nga nahimutang sa Lasang, Davao City. Dayon sa susamang tuig, namugna ang Malabog Catholic Association (MaCA), ang pundok nga nag-atiman, nagdumala ug naggambalay sa mga polisiya aron ang kristohanong pundok mapalambo ug magmalahutayon.

Dekada setenta, ang katilingban nagpadayon sa paglambo sa pagtoo ngadto kang Hesukristo. Ang mga pangulo nagmadasigon sa pag-alagad, bisan pa sa mga kalisdanan, panalapi ug ang halayu nga distansya ngadto sa parokya. Ang mga pangulo nagabaktas lamang padulong sa parokya aron makatambong sa mga pagtulon-an ug panagtigum.

Niadtong 1983, ang MaCA, pinaagi sa pagdumala ni Eulalio Bulias, nagpadayag ngadto kang Msgr. Antonio Ll. Mabutas, DD, kanhing Arsobispo sa Dabaw sa panginahanglan sa katilingban nga mamahimong parokya ang Sr. San Roque. Ang maong asosasyon nagmadasigon sa paningkamot, ug nakapalit ug kaugalingon nga luna alang sa pagtukod sa istraktura sa simbahan.

Nakita ug nabati sa Arsobispo ang maong panginahanglan, busa iyang gimanduan ang mga pangulo nga mangita ug dako nga luna, nga sarang katukuran ug dako nga simbahan pinaagi sa mahigugmaong pagpangalagad sa mga pangulo uban sa katilingban nga makab-ot ang gihandum.

Ang pamilya ni Alejandro Peloton, usa sa aktibong miyembro sa MaCA gibaligya ang ilang luna sa ubos nga kantidad ngadto sa Arkidayosis sa Dabaw pinaagi ni Msgr. Mabutas.

Sa susamang higayon nagmando ang arsobispo nga magkalap ug datos sa mga miyembro sa matag kapilya alang sa bag-ong pagatukuron nga parokya.

Adunay 35 ka mga kapilya ang anaa sa Barangay Malabog, lakip na ang barangay Sumimao. Apan dili kini bastanti aron mahatagan ug katumanan ang pangandoy sa katilingban. Busa uban sa pag-abag sa kasikbit nga barangay ug sa pagtugot sa parokya sa sagradong Kasing-kasing ni Hesus (Sacred Heart of Jesus Parish), Calinan ang pipila nila ka sakop nga kapilya gihatag sa Sr. San Roque aron mahatagan ug katumanan ang gidamgo sa katilingban.

Gilagdaan ni Msgr. Mabutas ang opisyal nga dokumento sa katukuran sa parokya ni Sr. San Roque, nga naglangkob ug 39 ka GKKs niadtong Nobyembre 22, 1984. Sa Susamang tuig, gipadala sa Arsobispo si Reb. Onesimo Tabaco, DCD isip unang kura paroko.

Nagmadasigon ang mga parokyano sa pagsuporta sa mga programa ug mga plano aron mapalambo ang katilingban. Natukod ang kumbento, ug nasugdan sa pagtukod ang dako nga istruktura sa simbahan. Na organisa ang mga ministriya sama sa Catholic Women’s League, Pangulo sa Katilingban, Pangulo sa Pagpanudlo, Knights of the Altar Server(KOTAS), ug uban pa.

Tuig 1989 miabot sa parokya ang pundok sa relihiyosong kababayen-an, ang Missionaries of Assumption (MA) sisters nga sa kasamtangan nagpadayon sa ilang apostolado nga mapalambo ang kinabuhi sa atong mga kaigsoonang lumad pinaagi sa edukasyon.

Si Rev.Fr. Onesimo Tabaco, DCD nagdumala isip kura paroko sulod sa pito ka tuig (1984-19910, dayon niadtong 1991, si Fr. Bernardino Amoroso, DCD ang nahimong ikaduhang kura paroko, Hamubo lamang ang iyang pagdumala sa parokya kay adunay hulga sa iyang kinabuhi, tungod sa iyang hugot nga pagsupak sa dili makatarunganong pagputol sa mga kahoy sa kabukiran. Si Rev. Fr. Atenedoro Sarona, DCD ang ikatulong kura paroko, dayon si Fr. Maximo Bahinting, DCD. Nagpadayon ang paglambo sa katilingban. Natukod ang seminar house pinaagi sa inisyatibo sa kura paroko nga makakuha ug hinabang sa gawas sa parokya. Nagpadayon sab ang pagpatrabaho sa dako nga simbahan ug naorganisa ang Parish Pastoral Council (PPC) niadtong 1991-1994. Human kang Fr. Bahinting, si Fr. Pedro Maniwang ang ika-upat nga kura paroko. Gipadayon ang nasugdan nga mga kalamboan ug mga kalihukan kabahin sa Kristohanong pagtoo. Adunay pisikal nga kalamboan sama sa basketball court ug mga konkretro nga kural sa compound sa simbahan. Kauban si Fr. Voltaire Dimol, DCD, naorganisa ang Confraternity Perpetual Rosary Movement ug ang katukuran sa pito ka mga GKKs sa Central Malabog.

Si Fr. Danilo Dotollo, DCD (1997-2000) ang ikalima nga kura paroko. Sa iyang panahon, adunay mga kausaban nga pisikal sulod sa kumbento padulong sa simbahan, dugang nga kalamboan sa basketball court, ug kahimoan sa sa konkreto nga bulletin board. Ang tanan uban sa madasigon nga suporta sa mga parokyano.

Misulod isip kura paroko tuig 2000-2006 si Fr. Loreto Bastasa, DCD. Nagmakanunayon ang kalamboan. Natukod ang CARITAS ug ang Debosyon sa Birhen sa Manaoag. Tuig 2006, gitudlo si Fr. Rolando O. Mandreza, DCD isip ika-pito nga kura paroko. Na-organisa ang CFC, SFC, ug YFC. Natukod sab ang San Roque Learning Center, nga naghatag ug edukasyon sa mga bata ubos sa paghatag ug teknikal nga suporta sa playnet Inc. Napatigayon usab ang Bigasan ug Botika sa Parokya, tindahan sa mga religious articles, pagpadako sa seminar house, pagbuhat sa sacristy, ug ang pagpadayon nga pagkalap sa pundo pinansyal alang sa pagbag-o sa estruktura sa simbahan, ilabina ang atop ug kisame niini. Tungod usab niini nga paningkamot natukod ang Parish Finance Council.

Tuig 2012, unang adlaw sa Hunyo mipuli si Fr. Henry Campeon isip tigdumala sa Parokya sa Malabog. Iyang gipapinturahan pag-usab ang simbahan, atop ug dingding niini. Iyang gisugdan pagpatiles ang salog. Apan nanghangyo si Abp. Romulo G. Valles, nga ibalhin siya sa siyudad sa Dabaw. Nahuman niya ang usa ka tuig nga pagpangalagad.

Isip hulip, miabot si Fr. Jemasol Ortiz niadtong Hunyo 1, 2013 ug iyang gidapadayon ang nasugdan ni Fr. Henry. Napahuman niya ang pagbutang ug tiles sa simbahan ug kisame. Gihiusa niya ang mga tanang pangulo sa Parokya. Namugna ang Women and Men Cursillos in Christianity, ug nasugdan ang income-generating projects sama sa pag atiman ug baboy, kanding, paghimo ug kandila, tableya, ug mais nga kape. Pagpaprinta ug SRP t-shirts ug pagtukod sa sacristy, nga tiwasonon karon tuiga. (Imelda Overiz | SRP SoCCom Malabog)

No Comments

Post A Comment