Immaculada Concepcion, Peñaplata, Island Garden City of Samal

Sa una, ang Isla sa Samal daan nang gipuy-an sa mga netibo, ang mga “Sama”, nga naminyo sa ubang lumad ug mga dayong Muslim gikan sa dakong yuta sa Davao. Misunod ang mga lumulupyo gikan sa Luzon, Visayas ug uban pang dapit sa Mindanao.

Sila nga unang lumulupyo nagbaton na ug debosyon sa makagagahum. Gipadayag kini nila sa ilang espirituhanong kinabuhi bisan tood gitoohan nga adunay mga misyonaryong Katoliko nga nauna pa nilang midayo sa Isla ug naghimo sa unang Misa sa Barangay San Jose.

Ang mga lumulupyo sa una nagatapok sa lain-lain nga pundok aron lamang ipadayag ang lig-on nilang pagtoo sa Ginoo ug pagpasalamat sa pagpanalipod, pagiya ug pagbendisyon niya sa ilang kinabuhi.

Sa tuig 1950, ang katilingban sa mga magtotoo sa Penaplata, Samal ug mga kasilinganang barangay, madasigong nakahuna-huna sa pagtukod ug usa ka istruktura diin sila mahimong magtapok alang sa espirituhanong panagtigom ug hiniusang pag-ampo matag Dominggo ug matag kapistahan.

Kining mga magtotoo nagpaila nga mga Katoliko.

Nagkahiusa sila sa pagplano ug pagahin sa ilang mga kinitaan o abot aron mapalit ang mga materyales nga gikinahanglan sa pagtukod ug kapilya sa usa ka dapit nga karon nahimo nang Samal Freedom Park. Gipili nila ang Immaculada Concepcion isip patron.

Sa diha nga nahibaloan ni Bishop Clovis Thibault, P.M.E., ang plano sa mga magtotoo, iyang gipadala si Fr. Paul Layahe, PME., aron matabangan ang nagpasiugda sa plano sa pag-organisa sa mga miembro sa katilingban.

Si Fr. Layahe ang nahimong unang kura paroko sa parokya gikan sa tuig 1952 hangtud 1955. Si Fr. Florian Roch, PME., ang sunod nga nahimong kura paroko. Sa tuig 1958, si Fr. Louise C. Sabourin, PME., ang sunod nga nag-alagad isip kura paroko. Si Fr. Henry Babin, PME., ang misunod nga kura paroko sa tuig 1959. Sa iyang panahon nahitabo ang pagkasunog sa simbahan. Wala masayri ang hinungdan sa pagkasunog niini.

Sa tuig 1965, si Fr. Jean Dennis Tremblay, PME., ang mipuli pagka-kura paroko. Mipuli niya si Fr. Guy Lamoureaux, PME., gikan tuig 1966 hangtud 1970. Gisugdan ang apostolado sa “Legion of Mary” sa panahon ni Fr. Lamoureaux.

Panahon ni Fr. Tremblay nahitabo ang ordinasyon ni Fr. Edgar Rodriguez, DCD, usa sa mga miembro nga mipadako sa parokya sa Samal. Ang iyang ordinasyon sa Davao gihimo.

Si Fr. Dennis Tremblay ang nakamisa sa bag-ong tinukod nga simbahan isip kura paroko tuig 1971. Gikan tuig 1971 hangtud 1973, ang mga PME nga kaparian sama ni Fr. Jacques Bedard, Fr. Norman Blais ug Fr. Bernard Robert sunud-sunod nga nag-alagad isip kura paroko sa parokya Immaculada Concepcion.

Sa tungang bahin sa tuig 1976, si Fr. Henry Veilleaux, PME, mao na pod ang nahimong kura paroko. Kauban niya si Fr. Gregorio Lanchance. Ug tuig 1980, si Fr. Herve Gautreau ang mipuli isip kura.

Sa tuig 1980 hangtud 1983, si Fr. Ceferino Castino, DCD, ang nahimong kura paroko. Gimugna niya ang pagmantala sa unang “Parish Newsletter” nga giuluhan ug “Ang Lantawan”. Sa misunod nga mga katuigan, si Fr. Elpedio Cabahug, DCD, ang mialagad isip acting parish priest sa parokya. Misunod kaniya mao si Fr. Atenodoro Sarona, DCD, nga nag-alagad sa parokya hangtud 1985.

Sunod si Fr. Pedro Lamata, DCD, ang gipadala sa parokya. Nahulipan ang posisyon ni Fr. Edgar Saco sa tuig 1986 tungod kay nianang tuiga, nasinati ni Fr. Edgar Saco ang pagsupak sa kabag-uhan sa palisiya sa GKK nga gimugna sa kura paroko nga iyang gisundan.

Sunod nga gipasilbi sa parokya si Fr. Pedro Lamata sugod sa kinatung-an sa tuig 1987 hangtud 1988. Giganid ang formasyon sa mga lideres sa GKK, gilig-on ang Parish Council ug ang mga grupo sa mga kabatan-unan sa matag GKK. Nagpadayon ang Confraternity of the Perpetual Rosary Movement.

Si Fr. Iluminado Adorable ang misunod sa pagka kura paroko. Siya nagsugod sa tuig 1988. Sa diha nga namatay si Fr. Iluminado Adorable tungod sa sakit niadtong tuig 1994, si Fr. Dindin Amoroso, ang iyang assistant parish priest na ang maoy temporaryo nga mihulip sa pangatungdanan isip kura paroko hangtud tuig 1997.

Gikan tuig 1997 hangtud 2012, sila Fr. Paul Dagangon, Fr. Florencio Acedo, Fr. Edmund Sombilon, Fr. Sixto Vistal ug Msgr. Maximo Sarno ang mga pari nga nag-atiman sa parokya sa Immaculada Concepcion – Penaplata.

Sa kasamtangan, ang kura paroko dinhi sa parokya sa Immaculada Concepcion mao si Fr. Danilo Dotollo, DCD.
Sa iyang panahon, iyang gipaningkamotan ang kinatibuk-ang “renovation” sa kumbento ug opisina ug sa simbahan. Ang maong renovation sa kasamtangan nagapadayon, ug 80 porsiyento na niini ang nakumpleto.

Matud pa niya, angayan lang pagahimoon ang maong proyekto sanglit nagakaduol naman ang parokya sa “Diamond Jubilee” niini. Ang parokya nagsaulog sa iyang ika 64ka tuig niadtong Disyembre 8 subay sa tema: Birhen Maria: Lig-ong Sumbanan sa Ligdong Panaghiusa ug Gugma diha sa mga Katilingban sa Parokya.

Sources: Gales, R. ICP Souvenir Book.
Photos/Research: Lemuel Asdang, ICP SoCCom