Kasaysayan sa Holy Family Parish

Ang parokya sa Sagrada Pamilya nagsugod lamang sa usa ka pangandoy sa mga mulupyo sa barangay Dumoy ug Baliok. Sa pagdagsang sa mga namuyo sa bag-ong subdibisyon sa Baliok, nidaghan usab ang natukod nga Gagmay’ng Kristohanong Katingban (GKK) nga kaniadto sakop pa sa Parokya sa San Lorenzo Ruiz sa Talomo, kinsang kura paroko, si Fr. Agustin Paunon.

Tungod sa kalayo ug sa nagkadaghang residente sa nahisgutang lugar, nangandoy ang mga tao nga unta makamugma sila ug usa ka parokya nga matukod duol kanila. Ang maong pangandoy, nga gipasibaw nahatagan ug katumanan tungod kay gidungog sa Ginoo ang ilang buot mahitabo.

Niadtong Pebrero tuig 2003, didto sa Fatima Chapel sa IWHA, Brgy. Dumoy, naghimo ug presentasyon sa atubangan ni Archbishop Emeritus Fernando R. Capalla, D.D. ang mga GKK leaders sa Dumoy ug Baliok mahitungod sa ilang pangandoy nga makamugma ug bag-ong parokya. Nahitabo ang paghisgot sa mahimong istruktura kun ugaling matukod na ang parokya. Atol sa panagtagbo, ang paglantaw sa kinatibuk- ang ihap nga katolikong nasakop sa maong mga barangay.

Niadtong Hulyo 25, 2003, 6:30 sa gabii, sa Rosalina III Covered Court sa Baliok, nahitabo ang unang panagtagbo nga naghisgot sa pagtukod sa bag-ong simbahan. Ang maong miting giapilan nila Vicar General Paul Cuison, Rev. Fr. Henry Campeon, Rev. Fr. Agustin Paunon, Dumoy Barangay Chairman Jessiemar Culaste , Baliok Barangay Chairman Rodulfo Bagajo, ug GKK Council of Leaders.

Usa ka tuig ang milabay, gihisgutan sab ang mamahimong ngalan sa bag-ong parokya. Nagpadagan ug survey ang mga pangulo sa nagkalain laing GKKs. Natunga ang gusto sa katawhan. Ubay- ubay pod ang nagsugyot nga Immaculada Concepcion. Ang uban gusto ug Sto. Niño aron sadya kung magsaulog sa pista. San Jose usab ang gusto sa uban kay walay trabaho ang Mayo 1, inig pista ni San Jose. Tungod sa maong tingog sa katawhan, nakahukom ang mga pangulo nga hiusahon ang ilang tingog, busa ang ngalan sa bag-ong parokya mao ang, Sagrada Pamilya (Holy Family).

Niadtong Agosto 1, 2004 atol ang unang binulang miting sa core group, didto sa Kapilya sa Immaculada Concepcion, gihisgutan ang pagmugna sa Parishioner’s Foundation ug ang pagpili sa board of trustees. Kauban usab sa maong panaghisgot ang pagpili ug luna nga tukuran sa bag-ong simbahan.

Niadtong Agosto 28, 2004 sa alas 3 sa hapon, sa Kapilya sa Birhen sa Fatima, IWHA, nahitabo ang pagpirma sa MOA nga may kalabutan sa pagpalit ug luna alang sa pagatukurong simbahan. Ang opisyal nga panagsabot gisilyuhan nila ni Fr. Henry Campeon, DCD, Honorable Rodulfo Bagajo, ang barangay chairman sa Baliok ug CEO sa Holy Family Parishioner’s Incorporated, ug si Mr. Braulio Lim, ang tag-iya sa yuta.

Niadtong Oktubre 2, 2004 nahitabo ang canonical erection sa Holy Family Parish. Niining higayuna usab, nahitabo ang instalasyon ni Rev. Fr. Henry Campeon, DCD, isip kura paroko sa Holy Family Parish.

Sa pagpangalagad ni Fr. Henry Campeon, gisugdan sa pagtukod ang temporaryong building sa simbahan niadtong Octobre 20, 2004. Tungod sa dakong suporta sa mga parokyano, daw sama sa damgo nga nahuman sa sulod sa 73 ka adlaw ang simbahan. Nahuman ang simbahan niadtong Disyembre 14, ug pagkaugma, Disyembre 15, gihimo ang formal blessing nga gipanguluhan ni Msgr. Julius Tonel.

Niadtong Disyembre 26, 2004 mapasalamotong gisaulog sa mga parokyano sa Barangay Dumoy ug Baliok ang unang parochial fiesta sa Holy Family Parish. Sa maong selebrasyon, gipadangat ni Arsobispo Capalla ang iyang kalipay nga nadungagan na pod ug parokya ang Archdiocese sa Davao.

Sulod sa 12 ka tuig, daghan na ug kabag-uhang nahitabo sa parokya. Ang gamay ug temporaryong balay- ampuanan nahimo nang usa ka dako nga Simbahan.

Sa kasamtangan, ang parokya adunay 36 ka GKKs nga giatiman sa kura paroko, Fr. Ricky Peñalosa, DCD.

Ang simbahan sa Parokya sa Sagrada Pamilya lig-ong nagabarog sa luna sa barangay Dumoy ug Baliok . Kini usa ka simbolo sa lig-on ug nagkahiusang parokyano sa Sagrada Pamilya. (Flordeliza Arellano- Deloria | HFP SoCCom)