Pit Senyor!
Sama sa pangilin sa Hesus Nazareno, ipakita pag usab sa mga Pilipino ang ilang kadasig ug kainit sa pagdebosyon sa Ginoo sa iyang pagka Diosnong Bata. Kon dunay Traslacion ang Hesus Nazareno, sa Cebu anaa ang Sinulog sa Sto. Niño. Pit Senyor!
Apan anaay lahi kayo nga diwa sa paagi sa pagsimba pagsaulog nga gipahayag niining mosunod nga pag-ampo ni Father Matta el Meskin ngadto sa Diosnong Bata sa pasungan sa Bethlehem. Gipaambit kini ni Papa Francisco sa iyang mga kaubang nangalagad sa Batikano,niadtong iyang mensahe kanila sa Pasko, Diciembre 22, 2017. Tuguti ako ninyong ipaambit kini sa binisaya ug atong pamalandongan kini:
Kung lisod kayo alang kanamo ang kasinatian sa imong pagkagamayng bata,
dili kini lisod alang kanimo O Anak sa Dios.
Kon madagma kami padulong sa pakighiusa kanimo tungod
sa imong pagkagamay, mahimo mong kuhaon ang tanang babag
nga magpugong kanamo nga mahimo namo kini.
Kabalo kami nga dili ka mahimutang hangtod dili mo kami mahikaplagan
nga nahisama kanimo ug nahisama sa imong pagkagamay.
Itugot kanamo karon, O Anak sa Dios, nga mahiduol sa imong kasingkasing.
Itugot nga dili namo isipon ang kaugalingon nga dako
diha sa among mga kasinatian.
Hinonoa, itugot kanamo nga mahimong gamay sama kanimo,
aron mahiduol kami kanimo ug makadawat gikan kanimo
sa imong pagkamapaubsanon ug pagkamapailobon.
Ayaw ihikaw kanamo ang imong pagpadayag
Aron madan-agan ang among kasingkasing,
sa imong pagkagamayng bata,
aron pinaagi niini mausab namo ang among pagkamapahitas-on.
Nanginahanglan kami nga imong ipahiluna dinhi kanamo
ang imong kayano, pinaagi sa pagdani kanamo ngadto kanimo,
ug sa tibuok Simbahan ug sa tibuok kalibutan ngadto kanimo.
Gikapoy ug naluya ang kalibutan
tungod kay ang tanan naninguha nga mahimong labing dako.
Hilabihan ka bang isang palabwanay tali sa mga kaggamhanan,
Mga simbahan, mga tawo, sulod sa mga pamilya,
Sa mga parokya: Kinsa’y pinakadako?
Ang kalibutan nag-antos sa mga samad nga labing sakita,
Tungod niining grabing sakit: Kinsay labaw sa tanan?
Apan, karon among nakaplagan diha kanimo,
O Anak sa Dios, ang saktong tambal.
Kami ug ang tibuok kalibutan dili makabaton og kaluwasan
O kalinaw, gawas kon mobalik kami sa pakigtagbo kanimo
Didto sa pasungan sa Bethlehem. Amen.
No Comments