Shepherd’s Time

Sa miaging binulan nga Presbyterium kon tigum sa mga kaparian niadtong Lunes, Marso 13, gibutyag ni Yanong Muloy ang pipila sa mga pahinumdom ug pagdasig sa mga kaparian sa mga lakang ug direksiyon sa Arkidyosis sa Dabaw. Pipila sa iyang gilakbitan ang mga mosunod:

Dunay pagahimuon nga pag-estudyo ug pagkumpirma sa pipila ka mga lugar nga posibleng mamahimong Shrine. Sutaon kung kining maong mga balaan nga lugar gidugok sa daghang katawhan alang sa ilang pag-ampo ug debosyon. Kini mao ang St. Jude Parish sa dalang Malvar, St. Joseph Parish sa Barangay Sasa ug GKK San Vicente sa Mulig nga sakop sa parokya sa Birhen De Los Remedios sa Crossing Bayabas, Toril.

Gikalipay ni Yanong Muloy ang pagpahibalo sa tanang kaparian nga opisyal na nga gikauyonan sa mga kaobispohan sa Davao, Digos, Tagum ug Mati (DaDiTaMa) nga ang Davao Catholic Herald newspaper ug ang DXGN 89.9 Spirit FM maoy opisyal nga mantalaan ug radyo sa rehiyon. Ang maong mantalaan ug radyo migamit na sa hitsas sa bag-ong teknolohiya nga maoy hagit sa Simbahan. Mao nga mabasa ug madunggan na kini dili lang dinhi sa Davao kondili sa tibuok kalibutan tungod sa social media. Nakig-alayon usab ang DXGN sa igsuong radyo nga AM ug FM sa Diosesis sa Mati, ang DXHM.

Pakusgan usab ang buhatan sa Matrimonial Tribunal dinhi sa DaDiTaMa. Pangunahan sa Simbahang lokal sa Davao, mag-alayon ang mga Canon Lawyers sa DaDiTaMa aron matabangan nga masulbad ang mga suliran nga may kalambigitan sa kaminyuon. Kini tubag sa tawag ni Santo Papa Francisco nga angay lihukon sa mga lokal nga Simbahan ang mga kaso sa mga managtiayon aron matabangan sila sa ilang sitwasyon.

Gidasig usab ni Yanong Muloy ang mga kaparian kansang presensiya nagpadayon nga madasigon alang niining binulan nga Presbyterium.

Post Your Thoughts