Managlahing formation seminars, giandam, gitambungan

MATI CITY – Karong Mayo 8-10, ang mga opisyal sa Association of Religious in the Diocese of Mati (ARDM) nga sila si Sr. Florita Galida, MIC, Fr. Antonio Nombrefia, OSA, Sr. Rosalinda Singo, CM, Sr. Evangeline Madayag, OSB, Sr. Belen Suemith, LGC, Sr. Teresita Asares, OSU, ug Fr. Randy Diamane, SDV mopahigayon og seminar-workshop sa mga parokyano sa parokya ni San Nicolas de Tolentino Cathedral didto sa St. Joseph Retreat House sa Brgy. Dahican, Siyudad sa Mati.

Ang pagbansay o training sa paghatag o pag-facilitate sa mga recollection/retreat nanghinaut nga magamit sa katekismo sa mga tulunghaan, partikular na sa campus ministries.

Nasayran usab gikan sa Bible Apostolate (BA) nga niadtong Abril 24-27, 2017, mitambong ang siyam (9) ka mga sakop sa BA (Mati diocese) sa Summer Bible Institute (SBI) sa siyudad sa Ozamis alang sa Mindanao Regional Formation Update of the Word of God. Ang mga mamumulong mao sila si Dr. Naty Pagadut, kalihim sa Episcopal Commission on the Bible Apostolate (ECBA), Bishop Broderick S. Pabillo ug Sr. Miriam, OSB, STL. Gisundan kini ug laing SBI sa siyudad sa Tagum niadtong Mayo 3-5, 2017 ubos sa pagdumala ni Sr. Miriam, OSB. Mga lain-laing topiko kabahin sa Bibliya ang gihatag sa mga naasoy’ng mamumulong.

Sa laing bahin, nagsugod na ang enrolment sa Immaculate Heart of Mary Academy (IHMA) sa Mati ning bulan sa Mayo alang sa Kindergarten kutob sa Grade 12 (K-12). Mahimong moadto sa buhatan sa Registrar o motawag sa telepono # (087)3883-232. Ang IHMA nakigduyog usab sa kalipay sa kamadrehang Missionary Sisters of the Immaculate Conception (MIC) nga nagdumala niini atol sa bulawanong jubileyo niadtong Abril 26, 2017, sa upat ka kamadrehan sa kongregasyon gikan sa managlahing parte sa nasud. Ang upat nga sila si Sr. Librada Bantilan,MIC, Sr. Emerenciana Madria, MIC, Sr. Ditma Luz Trocio, MIC, ug Sr. Luz Hufancia, MIC, nagbag-o sa ilang mga panaad atubangan ni Provincial Superior ug kanhi IHMA Directress Sr. Regina Villarte, MIC, didto sa MIC Retreat House Chapel sa Davao City, human sa walo ka adlaw nga annual retreat sa tanang mga MIC sisters sa Luzon ug Mindanao.