Duck, Cover, Hold: 1st quake, tsunami drill sa dakbayan malampuson

1st quake tsunami drill davao

Seryoso ang mga parokyano sa Agdao sa pag apil sa 1st Earthquake and Tsunami Drill. Misalmot sab ang mga estudyante ug mga empleyado sa nagkadaiyang establisyento sa palibot sa parokya. Layon sa Drill niadtong Hulyo 14 nga maandam ang tanan sa posibleng muabot nga kalamidad. (Elena Mozo | SAP SoCCom)

Alas nuebe sa buntag, Hulyo 14, Biyernes, dungan nga gipatingog ang kampana sa matag parokya sa Arkidayosis sa Dabaw, ug ang sirens nga gipakatag sa kabarangayan isip sinyales nga nagsugod na ang 1st Citywide Earthquake and Tsunami Drill nga daw mitay-ug na ang dakong linog.

Sa maong takna, dungan nga nanggawas ug mihimo sa “Duck, Cover and Hold” ang mga empleyado sa City Hall ug Sangguniang Panglunsod Building, lakip nga migawas ang mga empleyado sa dagkong tindahan, ug sa Rizal Park sila nagtapok tungod sa dakong hawan.

Samtang sa Crocodile Park usab, nahimo ang drill sa daw sama anaa sa tinood nga sitwasyon, diin nagpasad sa ground sa maong parke ang daw arang kadaghan sa mga samdan, ug gilayung miabut ang mga personahe sa Central 911 nga mihatag kanila sa first aid.

Sumala ni Emmanuel Jaldon, ang head sa Central 911, nga nagmalampuson ang maong drill ilabi na nga gihimo sa iyang ginsakupan ang tanan apan, aminado siya nga daghan pa gihapong aspeto ang kinahanglan palambuon.

Samtang dugang pa nga mas dakong hagit sa drill ang pagpatuman sa dagan sa trapiko tungod posibleng daghan ang wala nasayud sa maong aktibidad, apan sumala pa nga niadtung higayuna nakita niya nga nihunong ang kasagarang sakyanan apan mas maayung palambuon kung hain muhunong ang mga driver, arun mahatagan ug dalan ang mga mi responde sa katalagman lakip ang evacuation team.

Dugang sa opisyal nga luwas ang driver ug pasahero kun panahon sa linog anaa sila sa sulod sa ilang sakyanan, apan dapat wala sab nahimutang ang sakyanan sa tulay tungod posible kining mahugno ug angay wala sab sa overpass.

“One of the critical and challenging tasks ang traffic management, difficult yan, we people, probably not aware that we have the response, but kanina actually intentionally lumabas ako somewhere in Bucana area, to really obseve paano ‘yung flow ng traffic. Nag stop talaga lahat ng traffic. Just need to improve yung saang side sila mag stop, to give way to responders, to the evacuation team.”

Giklaru ug gipasalamatan sa opisyal nga sa naasuy nga drill dako ug gikatampu ang katawhan tungod gihimo kini nga seryosong butang maong nagmalampuson.

Drill sa Barangay Leon Garcia

Milanog ang sirena sa Barangay Leon Garcia sa Agdao aron sa pag-alerto sa tanang katawhan niining barangay sa pagsugod sa Earthquake and Tsunami Drill.

Dungan niana ang pag-abre sa “gate” sa Leon Garcia National High School ug Agdao Elementary School-Extension aron sa pag-andam sa paggawas sa mga estudyante padulong sa Agdao Flyover kung diin sila nagtapok aron mopadulong sa ilang evacuation site, ang University of the Immaculate Conception (UIC).

Nagkahiusa ang barangay officials ug functionaries, mga magtutudlo sa duha ka eskwelahan, ang Task Force-Davao aron sa pag-organisa ug paghan-ay sa gipahigayon nga drill.

“Duck, Cover, and Hold,” ang abtik nga gisulti sa usa ka grade one kung nganong anaa siya kauban ang iyang mga classmates.

Midugang ang usa ka bata nga, “para maluwas ko, ma’am.” Sa laing bahin, abtik nga naihap sa mga magtutudlo ang ilang mga estudyante, babae ug lalaki.

Nilahutay ilalom sa init sa adlaw ang 10 ka gagmay’ng bata sa St. Luke Daycare Center kauban ang ilang mga inahan, maestra ug tulo ka assistant. Andam sa emergency situation ang ilang pundok. Aduna silay medicine kit na gikan sa UNICEF.

Luwas nga nakauli ang mga estudyante balik sa ilang tagsa-tagsa ka tulunghaan nga parehas nahimutang duol sa dagat. Ang pipila nga kaso sa mga nakuyapan nga gikan sa high school dali nga nahatagan og pagtagad sa barangay responders ug sa 911 Emergency Unit.

Ang pangutana nga nagpabilin karon mao ang: “Nganong gamay ra man sa katawhan, gikan sa komunidad, ang misalmot?”

Sumala sa mga officials ug functionaries sa barangay, nga “wala mi magkulang sa pagpahibalo ug pag-awhag kanila sa pag-apil. Sila lang gyud ang dili gusto moapil,” dugang nilang sulti.

Ang pangutana, unsa pa man ang kinahanglang buhaton aron maandam sa maski unsang katalagman nga moabot ang tanan hilabi na ang wala nakaapil sa drill? (Bien Abanos | Elena Corazon Mozo, SAP SoCCom)

Post Your Thoughts