Mati Diocese malipayon sa pagkapili ni Archbishop Valles isip CBCP President

Sa ngalan sa diyosesis sa Mati, gibutyag ni Apostolic Administrator Msgr. Edito “Ed” S. Baño ang iyang dakong kalipay sa pagkapili ni Davao Archbishop Romulo G. Valles isip bag-ong pangulo sa Catholic Bishops’ Conference of the Philippines (CBCP).

Kini iyang gisulti sa text message ug hamubong pakighinabi sa DXHM/DXDV Catholic radio stations human gipahigayon ang CBCP eleksyon niadtong Hulyo 8, 2017, sulod sa ikaduhang asambleya plenarya sa kaobispohan karong tuiga.

Gitataw ni Msgr. Ed nga malaumon siya nga ang panaghigalaay sa duha, nga nanukad pa gayud sa lugar ni Presidente Rodrigo “Digong” Duterte sa Davao ang makahatud og maayong relasyon tali sa Simbahang Katoliko ug sa nasudnong administrasyon, luyo sa nahitabong mga negatibong interpretasyon sa papel sa Simbahan sa pagpanalipod sa kinabuhi sa tawo isip usa ka gasa sa atong maluluy-on nga Dios taliwala sa mga nahitabong ‘extra-judicial killings’ sa mga suspetsadong nagumon sa mga droga.

Sa iyang tulumanon sa radyo bahin sa bag-ong ebanghelisasyon, gipasabot ni Msgr. Ed nga angay unahon ang pagsulbad sa problema sa kawad-on, ug hingusgan ug palambuon ang kahiusahan ug paghigugmaay sa mga sakop sa banay. Samtang magpakabana usab ang tanan batok sa kadaotan ug magtinabangay kay kitang tanan managsuon.

Sa laing bahin, dugang usab gipahibalo ni Msgr. Baño ang umaabot nga mga dagkong piyesta sa mga parokya karong bulan sa Hulyo.  Una karong domingo, Hulyo 16, ang kapistahan sa Birhen sa Monte Carmelo nga saulogon sa Monasteryo sa mga madreng Carmelita sa Tuatua, Matiao, Mati City, ug kapistahan usab sa labing karaan nga simbahan sa Mindanao, ang parokya ni San Salvador del Mundo sa Caraga, Davao Or. Ang siling ang parokya sa Caraga, ang Santiago Apostol sa Cateel ang magsaulog usab sa ilang parish fiesta sa Hulyo 25, ug ang kapistahan ni San Ignacio de Loyola ang mahimong sentro sa selebrasyon sa Luzon, Sigaboy, DavOr, sa Hulyo 30, ug ang maong patron usab para sa Manay, DavOr sa Hulyo 31. Niining tuig sa parokya, mahimong tema sa mga selebrasyon ang “Tuig sa Parokya isip Nag-inambitay nga Katilingban” – panahon sa panaghiusa sa mga Gagmayng Kristohanong Katilingban (GKK), Lay Organizations, Movements and Associations (LOMA), ug ubang mga komunidad lakip mga tulunghaan ug mga relihiyosong congregasyon. Nanghinaut ang nagkadaiyang mga kura paroko nga mahimong hapsay, makahuluganon ug malipayon ang maong mga kasaulogan.

Post Your Thoughts