San Alfonso, Kalig-on sa Panaghiusa sa Parokya

Nahimong malampuson ug sadya ang pagsaulog sa ika-15 nga tuig sa San Alfonso Maria De Ligouri Parish, Mandug Davao City niadtong Agosto 1 subay sa tema, “San Alfonso, Kalig-on sa Panaghiusa sa Parokya.”

Sulod sa nilabay nga 9 ka adlaw sugod Hulyo 23, gisaulog ang Novena Masses matag alas 5 sa hapon. Nagpahigayon usab og nagkadaiyang aktibidad sama sa talent presentation matag GKK area, sports tournament ug fun run alang sa nagapadayong church construction. Mapasalamaton kaayo ang PCC, ADHOC Committee, parish staff, ug mga parokyano uban ni Fr. Victor Isidoro Gilay sa tanang grasya nga gipaambit sa kalampusan sa 15th parochial fiesta.

Ang adlaw sa pista niadtong Agosto 1 gisugdan sa prosisyon dayon ang mga misa sa buntag. Ang Pontifical Mass gipangulohan ni Arsobispo Romulo G. Valles nga nagsentro sa mensahe sa Eukaristiya diha sa iyang homiliya.

“Ang pinakaimportante ug sentro sa selebrasyon sa usa ka pyesta mao ang pagsaulog sa Eukaristiya nga mao ang tuburan sa tinuod na kinabuhi ug gugma sa Diyos na kung diin mikanaog ang Diyos ug nakigsalo kanato. Ug nga kita unta tanan mamahimong asin ug kahayag sa uban,” matud pa niya.

Paghuman sa Santos na Misa nagpahigayon og programa diin nagpasundayag sa ilang talento ang mga estudyante sa pipila ka eskwelahan palibot sa parokya ug mga GKK Servant Leaders. Sa gabii nagtapok ang mga pari alang sa “clergy night”. (Mary Almeria)

Post Your Thoughts