San Alfonso Ma. De Liguori Parish History

San Alfonso Ma. De Liguori ParishSa pagtukod sa parokya sa Bajada (Our Mother of Perpetual Help) niadtong Hunyo 1972, ang mga naggunit niini nga misyonerong Redemtorista giapil ang Mandug ug Callawa sa Buhangin District isip ilang mission areas. Dinhing mga lugara, napakaylap usab ang debosyon sa Inahan sa Kanunay’ng Panabang.

Nahimong sentro sa misyon ang Sitio sa Fatima, sa Upper Mandug. Niadtong mga tuiga usab, nagsugod pagpamalhin sa ilang mga bag-ong pinuy-anan ang mga homeowners sa Davao Development, Inc. sa Mandug busa nahimo silang kabahin sa misyon sa mga Redemtorista. Wala madugay, nahimong sentro sulod sa 20 ka tuig sa mga liturhikanhong kalihokan ang DDF chapel alang sa katawhan sa Upper Buhangin Barrios (UBB). Diri gipahigayon ang mga liturhiya, mga sakramento, ug mga programa alang sa pangulo sa mga GKK uban sa tabang sa mga Redemtorista, staff sa parokya, ug Maryknoll missionaries.

Tuig 2001 gikompirma ni Archbishop Emeritus Fernando R. Capalla nga adunay pagatukuron nga bag-ong parokya sa Mandug. Kini human gihimo ang konsultasyon tali sa Arsobispo ug sa mga Redemtorista.

Semana Santa sa tuig 2001, gitudlo si Fr. Leonardo “Bong” Dublan, DCD isip Parish Administrator.

Dili ikalimod ang kalipay ni Fr. Sean Purcell, CSsR, aktibong kura paroko sa Bajada sa dihang nabunutan uban sa pag-ampo sa Espiritu Santo ang ngalan ni San Alfonso Maria De Liguori nga mamahimong patron sa bag ong parokya.

Hunyo 1, 2003 nahimong pormal na gayud ang pagmugna sa parokya sa dihang gihimo ni Abp. Emeritus Capalla ang “Decree of Erection” uban sa unang gipili nga kura paroko nga si Msgr. Maximo Sarno. Human sa iyang termino, si Fr. Bebs Bastasa ang mipuli.

Gikan sa kapilya sa Sagrada Familia sa DDF, Hulyo 24, 2009 pormal nga nibalhin si Fr. Bebs sa bag ong luna nga gi-donate sa Pamilya Lorenzo. Kini na karon ang gitukuran sa parokya sa Lapanday Road, Mandug, Buhangin District, Davao City.

Dose na ka tuig ang pagdagan sa mga fund raising activity ug 22 milyones ka pesos na ang nalikom na pundo. Pipila lamang sa aktibidad nga nakatabang mao ang Sunday Masses 2nd Collections, GKK Halad/Regular Pledges, Pay-Per-View, Dinner for a cause, Souvenir Program, Time Capsule, Musical Concert Proceeds, 3-Year Individual Pledges, Coin Bank Proceeds, Raffle Ticket Sales, DART Tournament Share, Interest on Deposits, Mutya ng Parokya, Regular Chronicle Advertisement, Share-a-bag-of-cement. Sa kasamtangan, ang parokya ginadumala ni Fr. Victor Gilay. (Mary Almeria | SAMDL Parish SoCCom | SOURCES: Chronicle 2009 and 2012)

Post Your Thoughts