Duyog Marawi – Konkretong Tubag sa Pakigtagbo sa Kristong Hari

‘Kita ang unang gitagbo ni Kristo’ – Bp. Manlapaz

Nagkahiusa ang mga parokyano sa dayosis sa Tagum sa pagtubag sa tawag alang sa pakigduyog sa mga kaigsoonang Maranaw kinsa nahiagum sa lima ka bulan nga kagubot pinaagi sa programang DUYOG MARAWI nga gibutyag ni Bishop Wilfredo Manlapaz atol sa iyang homiliya sa pagsaulog sa Solemnidad sa Kristong Hari, ang ika 70 ka tuig nga kapistahan sa patron sa Tagum City.

Ang Duyog Marawi magdala ug mga gasa gikan sa sub-region sa Davao, Digos, Tagum, Mati (DADITAMA) sa pag ‘adopt’ sa usa ka lugar sa Marawi isip tabang sa atong kaigsoonan nga nanginahanglan ug mga bugas, asukal, kape ug uban pa, ug kining maong lihok sa Simbahan usa ka pagbuhat sa sugo ni Hesus sa ebanghelyo nga gibasa adtong adlawa, “unsa ang gibuhat ninyo sa labing ubos ninyong mga igsoon, gibuhat sab ninyo Kanako.”

Sa unang Santos nga Misa sa 4:30 sa kaadlawon Nobyembre 26, gisaulog ni Rev. Fr. Marlon Pates, kinsa nagpaambit sa iyang mensahe nga “Ang tinuod na kalinaw, kalambuan ug kalipay maangkon nato kung maghari ang Ginoo dinhi sa atong kinabuhi.” Gisaysay usab niya ang kasaysayan sa Kapistahan ni Kristong Hari sa tibuok kalibutan nga gideklara ni Pope Pius XI miadtong 1925. Ang Sakramento sa Bunyag usab para sa mga buot magpabunyag napahigayon pagka-alas 10:30 sa buntag sa maong parokya.

Bisperas sa kapistahan sa gipahigayon ang Tagbo o ang ‘Grand Procession’ sa tulo ka parokya, Christ the King Cathedral, Parish of Christ the Eucharistic King, ug Our Lady of Fatima Parish niadtong bisperas sa kapistahan, Nobyembre 25, Tagum Trade Center.

Kapin 500 ka mga parokyano bitbit ang pagtuo ug ang tagsa-tagsang imahen, luyo sa kakusog sa ulan, nagpadayon ang prusisyon nga nagsugod sa alas 3:15 sa kadlawon hangtod sa nag-abot sila sa Tagum Trade Center, Tagum City diin gisaulog ang Santos nga Misa ni Bishop Wilfredo D. Manlapaz, obispo sa dayosis sa Tagum nga naghatag sa iyang mensahe nga “Kitang tanan, gipangita ni Hesus. Kita ang unang gitagbo ni Kristo una kita nitagbo kaniya.”

Ug sa katapusan iyang gipasalamatan ang tanan sa ilang ‘rain or shine’ nga pagtuo ug panaghiusa alang lamang mapadayon ang “Tagbo.”

Ika-70 nga kapistahan

Una pa man gipatigayon ang maong kapistahan, gipangandaman na sa mga parokyano ang pagsaulog pinaagi sa paghalad ug Santos nga Misa kada adlaw inubanan sa nagkalain-laing grupo, komunidad ug mga organisasyon diin nasakop sa maong parokya.

Ang Parish of Christ the Eucharistic King (PCEK) o mas ilado sa kadaghanan nga old Cathedral adunay tema nga “Kini Mao Akong Lawas, Kini Mao Akong Dugo, Gihatag ug Giula Alang Kanimo.” Gawas sa adlaw-adlaw nga pagsaulog sa Santos nga Misa, nagpahigayon usab ang maong parokya ug “Tawag ng Tanghalan (Children and Adult Division)” niadtong petsa 24, alas-sais sa gabii sa Parish Hall ug ang Sakramento sa Kumpirmasyon para sa mga buot magpakumpirma adtong petsa 25, sa alas 9:00 sa buntag.

Ang Christ the King Cathedral (CKC), kung asa nato masaksihan ang world’s largest rosary nga isa sa mga ginapasigarbo sa mga Tagumeños. Ang Sakramento sa Kumpirmasyon para sa mga buot magpakumpirma gipahigayon sa maong parokya adtong petsa 25, sa alas 3:00 sa hapon. Ug niadtong Domingo, adlaw sa piyesta, Nobyembre 26, gisaulog ni Bp. Manlapaz ang Santos nga Misa sa Kapistahan sa Kristong Hari sa 9:30 sa buntag.

History

Sumala pa sa kaysaysayan, ang parokya sa Kristong Hari nagsugod sa pag-abot sa mga bag-ong misyonaryong pari sa Society of Foreign Mission of Quebec nga nag-atiman sa mga espirituhanong bahin ug sa posibleng pagbahin-bahin sa halapad nga teritoryo sa parokya sa San Pedro sa Davao City, ug pagmugna ug bag-ong parokya pinasubay sa Canon 216 of the Code of the Canon Law.

Ang maong kasabotan sa pagbahin-bahin sa maong teritoryo gisugdan uban ni Rev. Fr. Joseph Geoffrey, local superior sa mga kaparian. Apil niini ang municipal sa Tagum ug ang municipal districts sa Camansa, Monkayo, Kapalong, Compostela ug Saug, probinsya sa Davao, Agusan del Norte, mga parokya sa Cateel, Baganga, Kingking ug Bukidnon.

Ug mibarug gikan niini ang bag-ong parokya ni Kristong Hari nga nahimutang sa Magugpo sa Tagum nga ginasuportahan sa mga halad ug donasyon gikan sa dayosis of Zamboanga.

“Niadtong Easter Sunday Abril 6, 1947, sa Katolikong Simbahan sa Lungsod sa Magugpo, Tagum, Davao, ang halangdon Valerio P. Reyes, justice of peace, gibasa ang dekrito sa pagbarog sa bag-ong Parokya sa Kristong Hari ug ng pagnominar kang Fr. Lionel Labelle, PME nga maoy unang kura paroko.”

Kini pinaagi sa pagtugot ni halangdong Obispo Luis del Rosario, SJ nga naghatag kay Fr. Labelle ug katungod para sa bag-ong Parokya ni Kristong Hari.

Gikan sa pagka-prelatura ngadto sa pagka-dayosis, ang Christ the King ang nag-una sa pagsagop sa mga layko nga mga Organisasyon sama sa Legion of Mary, Holy Name Society, Barangay Sang Birhen, Adoracion Nocturna Filipina, Catholic Womens’ League, Curcillos de Cristianidad. Ug pagkahuman sa prelature pastoral planning assembly niadtong 1976, ang mga parokya nagduso sa pagmugna ug Gagmayng Kristohanong Katilingban (GKKs).

Niadtong panahona, adunay 132 ka GKK, 268 nga mga kaabag ug 285 ka mga katekista ang parokya. Sa kinadugay nga nagdaghan ang katawhan, nahimugso ang Our Lady of Fatima Parish tuig 1991, Our Lady of Assumption Parish tuig 1999, Sacred Heart of Jesus Quasi Parish tuig 2002. Ug sa tuig 2005, natukod ang “Christ the King Cathedral” nga gipahitabo ang dedikasyon niadtong Oktobre 11, 2005 uban sa pagsaulog sa silver jubilee celebration.

Timaan sa pagsaulog sa Year of the Holy Eucharist (2004-2005), gihimo sa atong Obispo Wilfredo D. Manlapaz nga gipatuman atong January 1, 2006 nga mamahimo nang PARISH OF CHRIST THE EUCHARISTIC KING ang unang Christ the King Cathedral.

Ug karon, ang Kura Paruko sa Parish of Christ the Eucharistic King mao si Rev. Fr. Juanito G. Lozano ug usab ang Kura Paruko sa Christ the King Cathedral mao si Rev. Fr. Warren P. Paramio, gipasalamatan gayod ug dako sa mga katawhan alang sa ilang maayong ug malipayong pagpaambit sa kasaulogan sa Kapistahan sa Kristong Hari sa dayosis sa Tagum. (Beverly L. Rabaja | Tagum SoCCom)

Post Your Thoughts