Popular devotions and New Evangelization

Niadtong unang Philippine Conference on New Evangelization niadtong 2013, si Padre Catalino Arevalo namulong bahin sa Popular devotions sa mga Pilipino.

Iyang gipahayag nga subay sa pagtulun-an sa Simbahan, dili nato tamayon ang popular devotions. Hinonoa, atong tagaan og rispeto ug dakong bili, tungod kay ang kadaghanan sa atong mga kaigsoonang Katoliko, ilabi na ang mga kabus, ang mga dili kaayo aktibo sa kinabuhi sa Simbahan, diha sa ilang mga debosyon ang paagi nga nasinati sa mga tawo ang presensya sa Dios sa ilang kinabuhi.

Kining mga debosyon maoy nahimong tulay sa Dios ug sa tawo. Pinaagi sa popular devotions ang mga katolikong pamilya nato nagamatuto sa ilang mga kabataan sa pagbansay sa pagtoo. Bisan kulang kaayo kita sa pormal nga katakesis, ang popular devotions maoy nagahatag og kinabuhi sa pagtoong katoliko.

Tinuod gayod kaayo kini. Tungod sa maong mga debosyon, buhi ang mga kapistahan sa mga Santos, ilabi na sa Mahal nga Birheng Maria, ug sa Ginoo. Mao usab ang nasinati sa panahon sa Kalagkalag, sa Misa de Gallo sa Pasko, sa kwaresma ug Semana Santa. Mao kini ang gikamingawan sa mga Overseas Filipino Workers nato.

Ang debosyon sa Diosnong Kalooy karon mao ang usa sa mga debosyon nga mikaylap ug maayo sa atong katawhan. Makahuluganon ug mapuslanon kaaayo kini nalang sa atong modernong panahon ubos sa yugo sa padayong hulga ug hagit sa kapintas ug gubat. Ang mga buhat, pulong, pag ampo sa Diosnong Kalooy maoy makapahupay sa mga kasakit nga nahiaguman ug makasumpo sa kadaot sa kahakog ug kasilag.

Matod pa ni Papa Francisco, kining popular devotions maoy dagway sa spiritualidad sa kadaghanan nga nagpabilin pang katoliko ning kalibutan.

Dinhi sa atoa, kabahin na usab niining mga debosyon ang pagpabunyag, pagpamisa, pagpadihog sa masakiton. Paghikap sa mga imahen, pagpahid sa panyo sa mga debolto. Bisan kulang kaayo ang pagsabot ug pagapil apan gipadayon gihapon. Nahimong mga espesyal nga takna sa kinabuhi. Sa kalooy sa Dios.

Ang kasaulogan sa sentenaryo sa Fatima karong tuiga, nakapukaw kanato sa dakong bili sa debosyon sa mga tawo. Matod pa sa CBCP, “In the same vein, it would be a lost opportunity if the year of the parish as communion of communities would ignore the clarion call of Fatima for prayer, penance and communion.” Tungod niini ang CBCP nagfollow up pinaagi sa pagawhag sa tanang mga Obispo, diha sa ilang dapit nga gipangalagaran, nga buhion ug dasigon ang pagtuman sa gipangayo sa Birhen sa Fatima – 1. Pagrosaryo matag adlaw. 2. Pagdebosyon sa 5 ka sunodsunod nga primerong sabado sa bulan. Dinhi sa DADITAMA, nagkauyon kaming namunoan dinhi sa pagtuman niini. Nagpagula kami ug hiniusang sulat pastoral alang niini niadtong Oktobre 13, 2017.

Matngoni nga 8 ka buok dayosesis nga Birhen Maria ang patron nila. Cotabato, Ozamis, Immaculate Conception; Digos ug kidapawan Mary Mediatrix of all Grace; Dipolog Holy Rosary; Jolo Our Lady of Mt. Carmel; Zamboanga Our lady of Pilar; Marawi Mary help of Christians.

Ang popular devotions buhi kaayo sa atong mga Gagmay’ng Kristohanong Katilingban ug sa parokya. Ipadayon nato ang pag-evangelize ug catechize niini aron magmabungahon pa alang sa panaghiusa ug kasantos ug kaluwassan sa tanan, ngadto sa makatarunganon ug mapadayonong kalinaw sa pamilya, nasud, ug kalibutan.