“Kamo Ang Maghatag Kanilag Pagkaon”

Solemnidad sa Balaang Lawas ug Dugo ni Kristo
Gen. 14:18-20/ 1 Cor. 11:23-26/ Lk. 9:11-17

Niadtong milabay nga piniliay, dunay mga tawo nga naghulat hatagan sa ilang kandidato. Human sa eleksiyon, ang mga napili sa pwesto gipanghinaut nga mohatag sa ilang serbisyo sa mga tawo. Kanindot gayod sa palibot kung dunay paghinatagay sa tinuoray nga wala nagpaabot og balos bisan dili panahon sa piniliay.

Ang diwa sa Solemnidad sa Balaang Lawas ug Dugo ni Kristo subay sa paghatag sa kaugalingon aron mabuhi ang kalibutan. Diha sa tinuod nga paghinatagay kinabuhi mapatunhay. Gilarawan ni Kristo ang tininuod nga paghatag diha sa Iyang mga aksiyon sa Yukaristiya.

Una, gipanalanginan Niya ang pan. Sukwahi sa panglantaw sa mga tinun-an nga nabalaka nga diyutay ra ang anaa kanila, si Hesus nagpasalamat sa unsay anaa. Gilantaw Niya nga bisan sa kagamay nga anaa kanila, problema masulbad ra. Bisan sa limitado nga kapaninguhaan, misalig Siya nga kini makaya. Mao nga inay kita mabalaka sa kagamay natong grasya, kita unta mahinumdom nga kini panalangin gikan Kaniya

Ikaduha, gipikapikas Niya ang pan. Sa pagpikas ni Hesus sa pan, ang gamay nga gigikanan midaghan. Bisan ginagmay ang matag-usa nakakaon ug natagbaw. Kini tungod kay Siya mibahin-bahin niini aron ang matag-usa adunay maiya. Kita usab unta makat-on sa pagpamahin sa atong bahandi, talento ug panahon aron kita magmalambuon.

Ikatulo, gihatag Niya ang pan sa mga tinun-an nga mao ang mihatag niini ngadto sa katawhan. Mahimo unta nga si Kristo mismo ang mohatag niini ngadto sa mga tinun-an apan gihatag Niya sa mga tinun-ang ang responsibilidad sa paghatag niini sa mga tawo. Siya misalign nga mahimo sa Iyang mga tinun-an ang Iyang mahimo. Magmanggihatagon usab unta kita sa uban sa atong makaya. Mosalig unta kita nga mahimo usab sa uban ang atong abilidad aron dili lamang sila makat-on kondili madugangan ang katilingbanong lihok ug partisipasyon.

Si Abraham diha sa unang pagbasa, human madawat ang panalangin mihatag sa ikanapulo sa tanan. Si Hesukristo diha sa ikaduhang pagbasa, mihatag sa Iyang lawas ug dugo alang kanato. Alang sa atong isigkaingon Kanato Siya moingon: “Kamo ang maghatag kanilag pagkaon.” (Fr. Johnny Autida)