Ang Pagtugyan sa Kaparian ngadto sa Putling Kasingkasing ni Maria

Nagmalamposon kita sa pagsaulog sa nasudnong pagtugyan sa Nasud ngadto sa Putling Kasingkasing ni Maria sa miaging Hunyo 8, 2013. Pinangulohan sa atong mga Obispo, ang atong kaparian misunod sa pagpahigayon sa pagpahibalo ug pag-andam sa katawhan alang niining mahinungdanon nga buhat sa Simbahan niining Tuig sa Pagtoo.

Bisan tuod nga kadaghanan sa nagpahigayon sa maong hitabo, mga laykong lideres, apan ang presensya, pag-awhag ug pagsupporta sa kaparian, dako ug bug-at kaayo nga bahin. Ug nagdugang pa hinoon sa kakugi sa  mga Layko sa pagtuman sa ilang mga kaakuhan. Ang presensya sa magbalantay mapuslanon ug mahinungdanon gayud.

Salamat kaayo sa kaparian nga nanlimbasog gayud, dili lamang nga moapil, apan, mao gayud ang nanguna sa ilang mga katawhan ug ginsakpan alang sa pagpahigayon sa pagtugyan sa Mahal nga Birheng Maria. Mao kini sila nqagpakabana ug nagtagad sa padayong kasanatos sa ilang katawhan. Sila ang nakasabot ug midawat gayud sa pangama sa Mahal nga Inahan, ug nagpakita sa ilang pagmahal   ngadto kaniyan ug sa pagmahal sa Simbahan nga ilang gialagaran.

Ang ika-2 nga Konsilyo Plenaryo sa Pilipinas (PCP II), miila na ug  mipadayag nga dinhi sa Pilipinas, ang  kabag-ohan ug kalamboan sa Pagtoo sa Simbahan, nga gilaraw ug gitinguha, magdepende sa kalamposan niini diha sa ministriya ug kinabuhi sa kaparian. Ang kabag-ohan ug kalamboan sa kaparian dako kaayo ug kalabutan sa mapadayonong kalamboan sa SImbahan.

Alang niining katuyuan sa padayong pagsantos sa atong kaparian, gitakda sa Simbahan nga ang PANGILIN SA LABING BALAANG KASINGKASING NI HESUS maoy ADLAW SA PAG-AMPO ALANG SA KASANTOS SA KAPARIAN sa tibuok kalibutan. Kining tinuig nga buhat sa Simbahan, karong Tuig sa Pagtoo, makahuluganon ug mahinungdanon pa gayud tungod sa Tinguha sa pagpalamabo sa Pagtoo sa tanang Katoliko, u gang kaprain dako kaayo og kaakuhan alang niini. Mao nga angay gayud tagaan og gibug-aton sa tanan ang padayong pormasyon sa kaprian alang sa pagsantos sa ilang kinabuhi

Sulod sa Simbahan gidasig sa Spirito Santo ang pagkahimugso sa pipila ka mga pundok sa kaprian kansang dakong katuyuan mao man ang pagtabang sa mapadayonong paglambo sa kasanatos  sa kaparian. Mapuslanon nga salmotan kini, sa tanang kaparian alang sa dugang pa nilang paglambo sa kasantos, nga gipanlimbasugan nang daan sa ilang tagsatagsa ka Diyosesis o Kongregasyon.

Ang Marian Movement of Priests, Apostolic Union of the Clergy, Jesus Caritas, Priests Focolare, ubp. ang pipila sa mga pundok nga gihisgutan sa unahan. Sa pagkatinuod, sa iyang sulat pag-awhag,  “Pastores Dabo Vobis” ni Blessed John Paul II, giawhag niya nga ang mga seminarian ug mga kaparian,  mangapil sa “new ecclesial movements ug communities” nga makadugang gayud sa ilang pormasyon sa kasantos.

Usa sa dakong kaakuhan diha sa Marian Movement of Priests mao ang padayong pagtugyan sa Putling Kasingkasing ni Maria, ug labaw sa tanan ang pagkinabuhi ug pagpangalagad pinasikad sa maong Konsagrasyon kang Maria. Sa hinayhinay nga pagumol sa Mahal nga Birhen, ang Pari mahimong sama sa dagway ug kasamahan sa Mahal nga Birheng Maria ug ni Hesu Kristo atong Ginoo.

Niadtong Hunyo 7, 2013 ang Pangilin  sa Santos nga Kasingkasing ni Hesus, nagpahigayon ang Marian Movement of Priests og 24 oras  nga Rosary Relay alang sa kasantos sa kaparian.  Alang niining Tuig sa Pagtoo, mapuslanon tingali nga padayonon nato kining makahuluganong buhat sa matag Unang Biyernes sa Bulan. 

Magpadayon kita nga mag-awhag sa tanan sa  pagapil niining Rosary Relay alang sa atong kaparian, nga maoy “Our Lady’s beloved Sons.” Tungod niini,  sila usab ang nahimong espesyal nga target sa kaaway sa Mahal nga Birehng Maria ug sa Pagtoo. Pinaagi sa ilang pagkahulog sa sala, maangin ang Simbahan, nga ilang giaalagaran.  Busa, kinahanglan nila ang panalipod ug pag-ampo sa  tibuok Simbahan.