Sa GKK, Pagtoo Magmalamboon

Kahimtang sa GKK Tutokan

Aron makita ang kasamtangang kahimtang ug mapalambo ang mga Gagmay’ng Kristohanong Katilingban (GKK), ipahigayon sa Archdiocese of Davao ang Parish Basic Ecclesial Communities (BEC) Data Validation ug BEC Vicariate Gathering.

Gilauman nga kini nga higayon makahatag og panahon sa maampoong pamalandong kabahin sa GKK ug sa pagpaminaw sa pagpaambit-pasabot kabahin sa simbahanong pundasyon sa GKK kauban ang mga coordinators sa GKK, PSK, GKK Ministry/Apostolate ug uban pang mga lideres sa GKK ug parokya sama sa Parish Pastoral Council ug uban pa.

Sumala sa plano, ang San Pablo Vicariate maghimo sa panagtapok Hulyo 13, Sta. Ana Vicariate Agosto 17 ug Immaculate Conception Vicariate karong Setyembre 22. Ang ubang vicariate anaa pa sa pagsabot-sabot sa ipahigayong vicariate assembly.

Ang pagahimoong BEC Vicariate Gathering nagsubay sa tema nga “Sa Gagmay’ng Katilingbang Kristohanon, Pagtoo Magmalamboon.”

Kabahin usab kining maong kalihukan sa atong pagsaulog sa Tuig sa Pagtuo. Mapadayunon kitang maglawig sa pagpangandam nato sa ika-500 katuig sa nasud sukad kita nahimong mga Kristiyanos. (@dcherald)