A ‘dinner for a cause’
Niadtong Hunyo 29, 2013, Sabado sa alas 6 sa gabii (6:00 pm) ang Virgen De Los Remedios Parish sa Crossing Bayabas, Toril nagpahigayon ug “Dinner for a Cause” sa Camp Alano Regional Program and Training Center. Dungan sa adlawng natawhan sa among Kura Paroko Rev. Fr. Johnny Autida nga 49 anyos na.
Ang “dinner for a cause” usa ka fund raising activity nga gipanguluhan sa Finance Committee sa among Parokya. Gisuportahan kini sa mga opisyales ug miyembro sa simbahan pinaagi sa pagpalit ug ticket nga nagkantidad ug 200 pesos nga adunay libreng panihapon ug may tsansang makadaog sa raffle ticket. Sulod sa ticket adunay makadaog nga 3 ka 1st Prize nga isa ka unit nga Cellphone kada usa, 2 ka 2nd Prize nga isa ka sakong bugas kada usa ug 1 ka 3rd Prize nga Stand Fan.
Mipakita usab ug suporta sila Rev. Fr. Roy Mejias, kura paroko sa Sto. Rosario Parish, Rev. Fr. Al Boltero, Chaplain sa Eden Nature’s Park ug si Rev. Fr. Jun Gemino, kura paroko sa St. Micheal the Archangel Parish, Panacan, pinaagi sa pagduaw ug pagsalmot sa aktibidad. Kapin 500 ka mga parokyano ang mitambong sa maong aktibidad. Gani mipakita sila sa ilang talento pinaagi sa pagkanta, pagsayaw ug pag akting nga maoy ilang presentasyon kada grupo.
Angdinner for a cause adunay tumong nga mabayran ang luna nga gitukuran sa simbahan nga nagkantidad ug 11 milyon. Tungod sa maong tumong kami nadasig aron magmalampuson ang among aktibidad. Dayag nga dako kaayo ang kantidad nga angayng bayaran apan kana wala namo gitan-aw nga problema kondili hagit sa usag-usa kanamo nga pinaagi sa among pagtinabangay, kadasig sa pagpangalagad sa Ginoo ug paglig-on sa among pagtoo kanang tanan among masolusyonan.
Contributor: Cielo B. Camargo
No Comments