Ang akong GKK San Juan

Si San Juan Bautista ang kadugong ig-agaw ni Jesukristo nga nagbaptismar sa atong Manunubos (Mk. 9-11.  Siya pud ang pinakakatapusang propeta.  Giputlan siya ug ulo sa sugo ni Herodes (Mk. 6:28).

Si San Juan Bautista nabantog sa pagpamunyag didto sa suba sa Jordan ug didto niya gibunyagan si Jesukristo.  Mao kini ang rason maong sa matag kapistahan niya ginabasa ang matag tawo nga masugatan labi na didto sa siyudad sa San Juan, Metro Manila.

Nahimo nang tradisyon sa matag kapistahan ni San Juan ang pagpamasa ug tubig matag June 24, ug kini tungod kay siya man ang magbubunyag ni Jesukristo.  Kini ginasinati sa mga taga San Juan, Manila ug sa uban pang mga lugar nga nagasaulog ug kapistahan.

Nan mao ba gayud kini ang tinuud nga pasabot sa iyang papistahan?  Kini usa sa mga pangutana nga naglutaw sa akong utok kung nganong San Juan Village ang ngalan sa among lugar dinhi sa Bangkal, Davao City.

Sa matag Sabado nagatambong ko ug Kasaulogan sa Pulong sa akong Gagmay’ng Kristohanong Katilingban.  Namatikdan ko nga dunay duha ka estatwa si San Juan.  Nahibaw-an ko nga gikan ang usa didto sa Bolton Isla.  Gi-relocate lamang sila kaniadtong 1960s.

Nakahimamat nako si Peter, lumulupyo.  Matud niya kilid ra sa ilang balay ang kapilya kaniadto ni San Juan, sa umaabot na ang iyang kapistahan ginapinturahan ni  Boy Santos (usa ka bantugang pintor) ang estatwa.

Sa pag-relocate nila sa Bangkal, gibitbit kini sa ilang presidente nga si Nicolas B. Magdaherin, Sr.  Wala pa sila nakapangalan sa lugar. Ga sige’g panagtapok ang mga opisyales nga ang katuyuan makatukod ug kaugalingong kapilya para ni San Juan.

Sumala pa ni Nang Inday Malubay, ang kasamtangan PSK, kakahuyan ug basakan nga ang gitukuran ug gipandayan ug payag ang gikahimutangan karon sa kapilya.  Ginganlan nila kini ug San Juan Chapel ug diri nila gisunod ang ngalan sa lugar nga San Juan Village.

By Joseph Nichols Magdaherin/Contributor