GKK-MPH Nangulo Sa Malampusong Treeplanting

Malampusong gipahigayon sa GKK-MPH (Mother of Perpetual Help) nga sakop sa VDLR (Virgen de los Remedios) Parish, Toril, Davao City ang  usa ka treeplanting activity kaniadtong Dominggo, July 7^th didto sa daplin sa kasapaan nga sakop sa Purok 16, Barangay Crossing Bayabas sa maong distrito.

Duol sa 50 ka mga lideres sa Hiniusang Pag-ampo (HP) Group 2, ug mga opisyales ug membro sa GKK-MPH pinanguluhan ni Mr. Ronald Mangmang, PSK, madasigong nagtanum sa 300 mahogany seedlings nga gikan sa DENR. Kahinumduman nga kaniadtong Zonal Meeting sa bulan sa Mayo 2013, gi-imbitahan si Mr. Prime Reyes, usa ka magtutudlo nga kanhi konektado sa DC Disaster Council aron mopaambit bahin sa environmental situationer sa atong siyudad. Sumala kang Mr. Reyes, ang Toril, particular sa Barangay Crossing Bayabas usa ka flood-prone area ug aron malikayan ang pagbaha, kinahanglan molihuk na ang katawhan samtang wala pay nasinati nga kalamidad.

“Kini sinugdanan lamang sa ka series of treeplanting activities nga pagahimoon sa HP Group 2 sa musunod nga mga bulan hangtud mapuno og tanum ang river bank padulong sa Marapangi area. Gibana- bana nga 20-30% lamang ang survival rate sa maong pagpananum, apan maayo na kaayo kun dunay mabuhi nga 60 ka kahoy”, matud pa ni Mr. Mangmang.

Ang nakalahi sa maong kalihukan kay dunay napili nga 16 ka pamilya nga nipirma sa ilang Pledge of Commitment aron sa pag-amuma sa mga tanum nga duol sa ilang balay. Ang maong treeplanting usa lamang sa mga line-up of activities sa GKK-MPH, Saypon, Toril,  alang sa kasaulogan sa ilang Golden Founding Anniversary karong Oct. 25-26, 2013. Ang mga GKK sakop sa HP 2 nga miduyog sa treeplanting mao kini: San Isidro Labrador(SILCA), Virgen Milagrosa Riverside, Sta. Cruz Upper Piedad, Holy Family Don Lorenzo Phase 1, San Lorenzo Ruiz Phase 2, Sto. Nino Bato, Sto. Nino Cogon, Sto. Nino Gravahan, Mary Queen of Heaven, ug San Lorenzo Ruiz Toleda.

Mapasalamaton kaayo si Mr. Mangmang sa tanang nisalmot sa treeplanting labina kang Engr. Reynaldo Fernandez, PSK Coordinator, Zone 2 nga maoy naghakot sa mga seedlings nga gipundo didto Sa VDLR Parish paingon sa planting area. Nanghinaut usab si Mr. Mangmang nga daghan pa ang moapil sa sunod. (Shalom Gonzaga, GKK-MPH)