‘Si Pedro, sama kanato’

Sama sa mga layko, si San Pedro miagi sa mga kalisdanan ug krisis sa kinabuhi apan luyo sa mga pagsulay, wala siya biyai sa Ginoo.

Kini ang giingon ni Bishop George B. Rimando, Kaabag nga Obispo sa Dabaw atol sa pagsaulog sa ika-165 nga kapistahan sa San Pedro Cathedral, Hunyo 29.

Sa iyang homiliya, giingon ni Bishop Rimando nga nindut nga matag tuig mapasalamaton ang katawhan sa Diyos tungod kay siya mihatag sa iyang anak aron magluwas kanato ug siya mitawag ug mga disipulo aron pagtabang sa pagluwas sama ni San Pedro.

Giingon ni Bishop Rimando angay balikan sa mga tawo ang relasyon sa patron nga si San Pedro ngadto sa Ginoo.

Dugang niya nga si Pedro sama sa mga layko nga adunay pamilya ug ang iyang kinabuhi sama usab sa mga layko.

“Pirmiro taphaw ang iyang pagtoo apan sa pagsunod niya kang Kristo milambo ang iyang pagtoo,” sumala sa Auxiliary Bishop sa Dabaw.

“Si Pedro miagi og krisis sama kanato. Pero wala kita biyai sa Diyos,” giingon ni Bp. Rimando. Dugang pa niya nga ang mga krisis pamaagi sa Ginoo aron mulawom ang pagtoo sa tawo.  Ug sama ni Pedro, ang matag usa mahimong mabungahon sa pag-alagad.

Giingon ni Bishop Rimando nga angay pasidunggan si San Pedro nga mao ang unang santo papa.

“Siya gitawag sa Ginoo nga mangulo sa atong Simbahan,” sumala niya. (@dcherald)