Unang Misa sa Domingo gisaulog sa bag-ong simbahan sa Indangan

Gisaulog ang unang misa sa adlaw’ng Domingo sa bag-ong simbahan sa Our Lady of Miraculous Medal Parish, Indangan, Buhangin District, DavaoCity.

Niadtong Hulyo 21, gisaulog sa kura paroko nga si Fr. Elneri Meñez ang misa kauban ang iyang mga parokyano sulod sa kanhing parish hall nga karon gihimong temporaryong simbahan alang sa adlaw-adlaw nga Misa.

Gidesisyonan nga himoon na ang mga misa sa naasoy’ng bag-o nga simbahan nga kanhi  ginahimo sa kapilya sa St. Joseph the Worker GKK diin gihimo ang canonical erection sa parokya niadtong 2009.

Ang unang misa sulod sa semana gihimo niadtong Hulyo 16, kapistahan sa Our Lady of Mt. Carmel.

Tulo ka misa ang ginahimo sa Our Lady of Miraculous Medal matag Domingo: sa buntag alas 6 ug alas 8 (Cebuano) ug alas 5:00 sa hapon (English).

Tungod sa pagkamanggihatagon sa tawo nahimo ang maong gambalay uban ang bag-ong parish rectory ug office sa parokya nga gipanalanginan ni Archbishop Romulo G. Valles niadtong Mayo 26 niining tuiga. (John Frances C. Fuentes/@dcherald)