Unang Parish BEC Data Validation Napahitabo sa Pablo

Niadtong Hunyo 20 ug 21, gipahitabo sa Parokya sa San Pablo, ang unang Parish BEC Data Validation dinhi sa Archdiocese sa Dabaw.

Pinangulahan sa kura paroko, Most Rev. George B. Rimando, inubanan nila Reb. Padre Zenon Ampong ug Leomel Puerto, Mrs.Vicky-Anghag, nga usa ka Pastoral worker sa Archdiocese sa Dabaw, mga Formators og Pastoral Staff sa parokya sa San Pablo, malampusong napahigayon ang duha ka gabiing Data Validation.

Ang maong kalihukan gisalmotan sa tulo (3) ka representante gikan sa singkwenta y otso (58) ka mga kapilya nga sakop sa parokya. Nakigtambayayong usab ang mga coordinators sa matag center organizations, mga apostolado ug nagkadaiyang liturgical ministries.  Gibana-bana nga adunay duha ka gatos ug napulo’g upat (214) ka mga partisipante nga gibahin sa duha ka gabii.

Nahimong mas makahulaganon ang maong aktibidad tungod sa presensya sa mga kaubanang parokya sama sa St. Jude Parish, St. Francis Ma-a, Ascension Parish ug uban pang parokya.   Wala usab nagpa ulahi ang Our Lady of Lourdes Parish og San Isidro Skyline nga abtik naminaw  sa ikaduhang gabii.

Ang tumong sa maong kalihukan mao ang pagpamatuod kung nagakahitabo pa ba sa mga Gagmayng Kristohanong katilingban  ang mga  datos nga natapok niadtong tuig 2009. Gipasibaw usab ang mga bag-ong realidad nga namatikdan karon diha sa GKK. (Jhenly Candia/contributor)