Ang pork barrel kinahanglan ma-abolish

Bisan pa sa sogyot sa ubang Obispo nga ipa-abolish ang pork barrel duna pa gihapoy pork barrel sa tuig 2014. Ang matag Senador P200 million, ang matag congressman P70 million ug ang total P27 billion. Matud nila istriktohon na daw nila ang paagi sa paggamit sa pork barrel. P27 billion dakong kwarta sa mga priority projects sa mga magbabalaod apan dili alang sa katawhan nga labi pa nga nagkinahanglan.

Bisan pa kung ang pork barrel idapat gayod sa kalsada, sa eskwelahan, ug sa tulay, atong hunahunaon kung unsa ba ang mas importante, ang mga projects o ang mga tawo? Daghan kayo ang mga tawo nga kinahanglan tabangan. Gipakita sa television ang mga pamilya nga maghulat sa mga gilabay sa basurahan aron sila makakaon. Mas maayo pa kanila ang mga iro ug iring sa mga adunahan kay ang ilang ginakaon matag adlaw dili gayod gikan sa basurahan. Ang mga iring ug iro sa adunahan dunay doctor ug medicina, apan daghan ang mga masakiton mga walay tambal ug walay doctor. Daghan ang mga pobreng mangingisda ug mag-uuma, mga walay balay nagpuyo ilalum sa tulay, mga nagpuyo sa balay nga mga guba o na-foreclosed, ang mga anak sa mga sundalo nga nangamatay, mga makililimos ug mga bata nga wala na mag-eskwela ug kanunay namasura, mga bata nga buot mokuha og vocational courses apan naglisud sa pamasahe, ug ang uban nagsuicide kay walay pambayad sa tuition fee, kulang kita sa mga facilities and services for youth offenders and drug addicts- sila unta ang prioridad nga kinahanglan maatiman sa atong gobyerno.

Ang dakong inhustisya batok sa mga kabus mao nga ang mga pork barrel, sumala sa namantala, tua sa mga peke nga NGO’s ug mga ghost projects., ug napulo na ka tuig nga kurapsyon sa pork barrel apan karon lang kini mabulgar! Nganong karon lang?

Mahimo nga kita magpakahilum apan kinahanglan nga mag-ampo. Hinonoa, kinahanglan pod tingali nga kita mag-noise/saba, mag-prayer rally, mag-protest rally, o kaha mag People Power aron mawagtang ang mga pork barrel. Daw walay kusog ang tingog sa mga Obispo sa CBCP, busa kinahanglan ang tingog sa katawhan. Dunay nag-ingon nga dili gayod mawala ang pork barrel. Kung duha na ka Presidente ang atong gipapahawa pinaagi sa people power, nan, mas kaya nato nga ipalagpot ang mga pork barrel! Pork barrel system is an evil design. Dunay nag-ingon, “The only way for evil to triumph is for good people to do nothing.”

BISAG UNSA – Fernando A. Saludes