Immaculate Conception Vicariate Gibansay Bahin sa Tuig sa Pagtoo

Aron mapakaylap ug mapalawom pa ang pagtoong Katoliko ngadto sa mga miyembro sa Gagmayng Kristohanong Katilingban (GKK) sa Immaculate Conception Vicariate, gipahigayon ang Trainor’s Training on the Year of Faith Module sa Virgen Dolorosa Parish niadtong Hulyo 27.

Giapilan sa 37 ka mga Formators sa tibuok vicariate ang training didto sa Virgen Dolorosa Parish Conference Hall, Babak, Island Garden City of Samal.

Ang maong aktibidad gipangunahan gayod ni Bishop George Rimando ug ni Msgr. Abel Apigo. Sa maong katikaran gibatbat sa mga mamumulong ang upat kabahin sa module nga nagtuki sa mga mensahe ug pagtulon-an sa atong simbahan. Ang unang parte nga bahin sa Porta Fidei ug ang ikaduhang parte nga bahin sa pagpasabot sa Second Vatican Council gibatbat ug gipasabot ni Msgr. Apigo. Samtang ang ikatulong parte nga bahin sa pagpasabot sa koneksyon sa Second Vatican Council ug sa Catechism of the Catholic Church gibatbat ug gidetalye ni Bishop Rimando.

“Ang katuyuan niining panagtigum ug pagbansay mao ang pagdugang sa pagtoon ug Pagpalawom sa pagtoong Katoliko. Sa maong paagi usab magiyahan ang mga formators kung unsaon pagtudlo ang module sa ilang mga GKK,” sumala pa ni Msgr. Nelson Lucas ang Kura Paroko sa Virgen Dolorosa Parish.

Ang tanang mga formators nga nakaapil sa maong pagbansay malipayon ug malaumon nga unta inigbalik nila sa ilang mga parokya mamahimo unta silang instrument aron sa pagtubag sa hagit sa kanhing Santo Papa Benedicto XVI nga mapakaylap sa mga GKK ang bag-ong ebanghelisasyon aron molambo pag-usab ang pagtoo ug ang kaikag nga isangyaw sa kadaghanan ang pagtoong Katoliko.

Rommel R. Jandayan