“PARI: Magsalum sa Katawhan sa Diyos”

MATICITY –  “Mosalum gayud ang pari sa pagpakig-uban sa katawhan sa Diyos labi na niadtong atua sa lagyong mga dapit, inay maghulat nga sila moduol kaniya.”  Kini ang gipaambit nga impresyon ni Fr. Samuel “Sammy” Broñola, kura paroko sa Divine Mercy Shrine and Parish sa Madang, Mati City, sa usa ka hinigayon nga pakighinabi sa Clergy House human sa retreat sa kaparian sa Diyosesis sa Mati, Agosto 5-9, 2013, didto sa Little Bridge Retreat House ni Fr. Fernando Suarez, MMMP, sa Butong, Taal, Batangas.

“Nadasig kami sa among mga misyonaryong paningkamot sa paglakat, pagtungas og mga bukid aron lang himoong buhi si Jesucristo sa diwa sa bag-ong ebanghelisasyon,” matud pa sa pari, dugang sa pag-ingon nga “akong nasinati ang dakong gasa sa pagbag-o usab sa akong parianong panaad o commitment diha sa pagsangyaw sa mga GKK, kauban sa mga dedikadong layko—baskog gihapon bisan gulang-gulang na ta.”

Gidugang usab pagpasabot ni Fr. Roberto “Bert” Ombon sa Sto. Niño, Kinablangan parish, Baganga, nga giduot sa retreat ang pagka-maalagarong magbalantay kon solicitous shepherd sa usa ka pari, labi na sa panahon sa mga katalagman, sama sa gi-share ni Fr. Raul Dael, ang Retreat Director gikan sa Cagayan de Oro, kinsa mahinuklogong nagbabad uban sa mga biktima sa bagyong Sendong sa Cagayan ug mibisita usab sa mga survivor sa bagyong Pablo sa Davao Oriental alang sa paghimog debriefing/psycho-social intervention; mga serbisyo nga iya usab gipakita sa video.

 Unya si Fr. Bert nagsaysay nga siya pod niadtong alaot nga hitaboa naghukom nga magpabilin ug makigbisog uban sa iyang mga parokyano ug ubang naga-antus nga lomulopyo tungod kay ispirituhanong katungdanan kini niya isip pastor o kura paroko nga atimanon ang kinabuhi sa iyang panon, ang ilang kaayohan labaw sa  kaugalingon.

Renewal and Witnessing usab ang gipaambit ni Caraga parish priest Fr. Uldarico “Lolong” Toroba, sa pag-ingon nga “na-renew gayud ako sa akong pagkapari ug pagka-gamut diha kang Kristo, ug natandog ako ug kaming tanan sa mga personal nga kasinatian ni Fr. Dael gikan sa iyang pagkabata sa pamilya sa mga pobreng mananagat ug mag-uuma hangtud sa iyang pag-misyon ngadto sa mga timawa; usa ka sea-farm-ation, matud pa sa among retreat director nga maoy formator usab sa seminaryo sa Cagayan.”

Si Fr. Nestor Morata, kura paroko sa St. James parish, Cateel, ug si Fr. Jacinto “Dodong” Ortiza, Cathedral parochial vicar, sama sa lagmit tanang 41 ka mga pari gikan sa 18 ka mga parokya (gawas sa Boston parish) ang nagbutyag sa ilang dakong pasalamat sa mga healing graces sa Diyos sa kalag ug lawas, partikular ang maong gasa gikan sa mga kamot ni Fr. Suarez, ang healing priest, aron magmatinud-anon sila sa pagkapari.

Gitanyag usab ni Fr. Suarez ang libreng paggamit sa iyang retreat house sulod sa lima ka adlaw—free food and accommodation—ug kini gipasalamatan og dako kaayo sa kaparian pinaagi ni Fr. Nelson Martinez, ang presbyterium president, samtang mitunol usab og mga pahalipay alang sa host ug retreat director si Fr. Jay Ramos, ang retreat coordinator.

Ug dili ikalimod ang pagmahal gayud ni Obispo Patricio Alo sa iyang kaparian diha sa iyang pagtambong sa ilang hinapos nga kalihokan ug pagpanguna sa panagtigom sa presbyterium nga didto na gipahigayon; kahinumduman nga natapos na sa obispo ang iyang retreat sa Tagaytay sa miaging bulan kauban ang kaobispohan sa CBCP.

By Sr. Marietta Alo, OND/Contributor