JESUS I TRUST IN YOU

In 1998, sa SONA ni Erap, “pork barrel, should be abolished>” (PDI 8/24/13, A 17). Wala ma-abolish ang pork panahon ni Erap ug wa pod maabolish ni GMA nga mipuli pagka- Presidente sulod sa 9 ka tuig. Ang report sa COA mahitungod sa anomalia, 3 ka tuig: 2007-2009, busa mas daghan pa ang mga kwarta nga nawaldas. Hinonoa, bisan utingkayon pa nato ang tanang mga tuuig ug ma priso ang mga responsible sa pork scam, kini wala nay kapuslanan alang niadtong namatay na sa gutom, namatay na kay walay medicina, ug nagsuicide kay walay pambayad sa pag eskwela! Busa, mas maayo nga i- abolish ang pork barrel kay sa mawala ang kwarta. Duna na kunoy istrikto nga pamaagi apan kini dili garantiya kay bisan unsa nga balaud supakon sa tawo aron makakwarta. Dunay karatula, “Be Honest” Malisud kini tumanon kung dunay pork barrel.
Kung ang senador mao ang dunay tawo/NGO nga mohangyo kaniya alang sa kalsada, tulay, o school building, nan,makahimo pod siya sa pag-ingon, “seguroha nga sa inyong lugar modaug ko sa eleksyon.” O “mopirma ko og request basta mopirma ka og checque (60%) ibutang sa ngalan sa among XYZ foundation.” (Kung ang kwarta atua na sa banko, ang Manager mao ang mag-widraw sa kwarta aron ihatag ngadto sa mga hintungdan) Ang manager lang ang nag- widraw sa kwarta apan daghan ang makadawat nga walay ebidensya. Busa bisan kinsa nga dunay authority pag request o pag- recommend, sayon ra ang pag-ingon, “gi-peke ang akong pirma”, “dili namo trabaho ang pag susi kung peke ang NGO’s” o “ghost ang mga projects.”
Kadaghanan nagtuo, nga dunay mga senador ug congressmen nga nasayod sa pork barrel scam, ug sila adunay katungdanan sa pagsanta o pagpadakop sa mga operator niini ug dili unta bilyon ang kwarta nga nawala nga gikinahanglan kaayo sa mga tawo nga nagka lisudlisud.

Nabulgar ang pork barrel scam dili tungod sa abilidad o kakugi sa mga tawo nga gi sweldohan sa gobyerno kundili tungod kay ang mga tawo nga operator sa pork barrel scam nagka sumpaki. Mahibaloan kaha nato ang pork scam kung si Benhur wala pa motug-an? (Pasalamat ta kang Benhur) Motug-an kaha si Benhur kung wala pa siya ipakulong ni Napoles?
Sumala sa mantalaan si Benhur nag-ingon nga gi-kidnapped siya tungod kay kuno nagduda si Napoles nga nagplano siya nga magtukod og ilang NGO kumpitensya kang Napoles. Sa ato pa, kung wala siya “ipakulong” ni Napoles malagmit nakatukod sila og mga bogus nga NGOs nga makigkunsabo sa gobyerno aron pagwaldas sa pork barrel. (Tingali, angay kitang magpasalamat pod kang Napoles)

Nabulgar ang pork barrel scam sa paagi nga wala nato palandonga. Ako nagtuo nga kining atong nasud kanunay nga gipanalangin sa mga pag-amoma sa atong Ginoo. “Jesus I trust in You!”