Pork barrel gamiton sa tanang naguba

Daghang mga naguba nga mga tulay, kalsada, dikes, ug mga eskwelahan sa nagkalain-laing dapit. Kinahanglan nga kini ayohon dayon. Busa ang pork barrel nga P25 B sa mga senador ug congressmen, mas maayo nga kini gamiton sa pag-ayo sa mga naguba kay sa gamiton nga pork barrel sa mga senador ug congressmen sumala sa ilng pagbuot. Unahon ang mga projects nga labing gikinahanglan sa atong nasud. Imantala asa padulong ang kwarta. Karon pa nila gimantala nga nawala na ang pork barrel. Sa Senado dunay mga 35 ka mga regular oversight committees busa ilang bantayan nga mga kwarta maggamit pag-ayo alang sa mga projects karong 2013.
Magbuhat kuno ug mga regulation nga istrikto aron dili maabuso ang pork barrel. Bisan pa hingpit ang atong sistema kung corrupt ang mga magdumala, segurado nga mangita silag paagi aron makakwarta. Tinuod dunay mga pork barrel nga gihatag ngadto sa mga government implementing agencies. Apan kung si Juan mao ang may gahom nga mag request aron ang pork barrel ma release, nan, kung dunay muduol kang Juan nga nagkinahanglan sa iyang pork barrel, makahimo si Juan pag-ingon, “mopirma ko og request basta advance ang akong 60% share.” Kung makuha na ang advance share, bahala na mohilak ug mag-antos ang uban tungod sa mga peke nga NGO’s ug ghost nga mga projects basta dunay mga documento.
Sa gobyerno dunay COA, ang senado dunay 35 ka oversight committees, ang mga ahensya dunay intelligence fund apan ngano nga walay nag-expose sa 10 na ka tuig nga pork barrel scam? Kini nagpasabot nga kung dunay mga naomalya magkasinabot lang gihapon sila. Ang mga fake NGO’s ug ghost projects bisan nakahibalo sila wala gayoy bisan usa nga taga gobyerno nga mitug-an. Ang pork barrel scam na-expose dili tungod sa abilidad, sa kaabtik o sa intelligence fund, sa Budget Department o sa COA, kundili tungod sa mga whistle blowers nga wala magtrabaho sa gobyerno. Sa pagkatinuod, kinahanglan ang pagsaway. Apan mas gamhanan ang pag-ampo kay kini makahimo og daghang butang nga dili mahimo sa tawo.