Supak ba si Kristo sa Celibacy?

Si Danny A. Quintana, (Opinoin Column, PDI 8/30/13), nagsaway sa balaud sa Simbahan mahitungod sa celibacy.(1)”celibacy..imposing it on an overwhelming majority that does not want it. “(2) “ecclesiastical officials,..willing to nullify the Word of God and uphold a human law..as more important.”(3)”Christ never imposed celibacy on his apostles.”

(1) Celibacy pabor sa katawhan- Ang kadaghanan dili uyon nga magminyo ang pari tungod kay ang ilang suportahan dili lang ang pari, kundili apil na ang asawa ug mga anak. Pagka-karon, kinahanglan suportaan ang mga parokya, busa matag karon ug unya dunay second collection matag Domingo. Busa, mas labi pa nga maglisud ang parokya kung ang pari dunay pamilya labi na kung dunay magkasakit ug mag-eskwela. Kung walay pambayad sa hospital ug sa eskwelahan, nan, ang basulon mao ang sakop sa parokya. Busa ang balaud sa Simbahan nga dili magminyo ang pari nagpagaan kini sa obligasyon sa pag suporta sa Simbahan.

(2) Maglisud ang pari. Ang pari nga minyo malagmit mamili og mga parokya nga ang collection dako ug makasuporta sa iyang pamilya. Niini nga kahimtang, malagmit, nga dunay magbagolbol ug muingon. “Ang iyang mga anak sa private school apan ang atong mga anak naa sa public school! Ang anak sa pari nindot ug pagkaon ug sinina apan kita nga nagasuporta kanila mao ang naglisud..” Ang mga bagolbol batok sa asawa ug mga anak sakit kaayo nga pamation. Busa, ang bagolbol batok sa parokya dili na nato dugangan sa mga bagolbol batok sa pamilya.

(3) Mga Obispo? Dunay kaparian naglisud kay ang katawhan naglisud pagsuporta sa ilang mga parokya. Sa kalisdanan sa pari maangin ang asawa ug mga anak. Sa laing bahin, ang problema sa asawa ug mga anak maangin pod ang pari. Busa, si San Pablo nagtambag, “Maayo alang sa usa ka tawo nga dili magminyo… Maayo unta kung kamong tanan sama pa kanako..nga magpailing mag-inusara sama kanako.” (I Cor. 7:1-8) Busa ang sogyot nga tugotan ang pari nga magminyo, sukwahi sa sogyot ni San Pablo, ug dili kini solusyon kundili nagdugang pa hinuon sa problema sa atong Simbahan. Imbis balay sa asawa mas maayo pa nga dunay balay sa mga pari nga nag-retire aron pari lang gihapon ang mopuyo bisan dunay mamatay.

(4) Si Kristo dili supak sa celibacy. Siya nag-ingon, “ang uban dili makaminyo tungod sa Gingharian sa langit.”(Mt. 19:12) ug “sultihan ko kamo niini: bisan kinsa ang mobiya sa iyang puluy-anan o asawa,… o mga anak tungod sa Gingharian sa Dios, makadawat og mas labaw pa..(Lk. 18:29-30) Busa, mas maayo nga ang mag-pari dili na lang magminyo kay sa atong panahon dili mahimo nga ibaligya sa bana ang iyang tanang katigayonan, ug unya biyaan ang asawa ug mga anak. Pillion sa Simnahan kadtong uyon nga dili magminyo aron dili mahitabo nnga dunay asawa ug mga anak nga mag-antos tungod kay ilang gibiyaan.

(5) Ang Simbahan adunay katungod sa pagpili kung kinsa ang angay mosulod sa pagkapari. Busa ang Simbahan adunay gahom sa paghimog balaud (Mat. 16:19) Ang Simbahan wala magpugos sa celibacy ka yang Simbahan wala magpugos sa tawo nga mosulod sa pagkapari. Ang pagka-pari inbitasyon sa Ginoo pagsilbi sa Iyang katawhan.”Ang nagsilbi sa altar sa altar pod manginabuhi.”Ang modawat sa imbitasyon dili angay nga mangimbitar pod ug asawa ug mga anak aron manginabuhi diha sa altar. Kinsa ba ang gikinahanglan nga dunay obedience?