Monsignor nagpahinumdom mahitungod sa saktong pag-ampo sa Rosaryohan

Nagpahinumdom ang Vicar General Sa Archdiocese of Davao mahitungod sa posibleng ‘functional’ nga pag-ampo sa Santos nga Rosaryohan.

Sumala ni Msgr. Leonardo Vicente nahimo nang balik-balik ug ‘functional’ ang pag-ampo sa Rosaryohan kung wala gipamalandongan sa huna-huna ug kasing-kasing ang pag-ampo sa mga misteryo niini.
Sa culmination sa month of the Holy Rosary sa San Pedro Cathedral niadtong Oktubre 30, giingon ni Msgr. Vicente nga bisan pa nahuman na ang bulan alang sa Santos nga Rosaryo, ang pag-ampo sa Rosaryo walay kahumanan.

“Kahiusahan ang gina-emphasize sa Rosary. If maputol ang beads kulang. Unta ingon ana ang ato pagbati sa usa’g usa,” sumala ni Msgr. Vicente.

Dugang usab niya nga dili angay hikalimtan ang gibuhat ni Maria alang sa katawhan. Giingon niya nga siya ang panig-ingnan sa pagtoong Kristiyano.

Giingon ni Msgr. Vicente nga si Birhen Maria ug ang Santos nga Rosaryo usa ra. Ug si Mama Mary ang kabahin sa ebanghelyo. Tungod sa iyang pagsugot sa kabubut-on sa Ginoo nga mahimong inahan ni Hesus, gipakita niya nga siya naminaw sa pulong sa Ginoo sa espesyal nga paagi.

Si Maria nag-antus sa pila ka bulan sa pagsabak kang Kristo ug angay nga pamalandongan sa tanan ang misteryo sa Rosaryohan hangtud sa kamatayon.
“Hagit kana kaninyo ilabi na kung tapulan kita mu-ampo sa Rosaryohan,” dugang niya.