Sulat Pastoral sa Obispo sa Digos

“Bulahan ang maloloy-on, kay kaloy-an sila” (Mt. 5:7)
Minahal kong mga kaigsoonan diha ni Kristo:

Human na ang pipila ka adlaw sa atong pagsaksi ug paglantaw sa katalagman nga nahiaguman sa atong mga kaigsoonan sa Kabisay-an tungod sa mabangis kaayo nga bagyo nga Yolanda. Nagakaanam og ka klaro ang kadako sa kaalaot nila nga dili lamang magkinahanglan ug hinanaling tabang apan ang mapadayunong pagsuporta aron makabangon sila pag-usab ug moharong sa mga kalisdanan nga pagaatubangon. Ang atong mga galamhan ug kasingkasing daw kumoton sa paglantaw kanila nga mga biktima niining kalamidad.

Gipukaw kita ug gidasig nga dili lamang magpabilin nga manan-aw, kon dili magmanggihtagon nga molihok ug motampo sa pagtabang kanila. Niining panahona walay pobre o dato, gamhanan o huyang nga makaako nga dili magpakabana ug magtagad ug motampo. Tuod man, lain laing grupo ug ahensiya, pribado o publiko, mga katilingban ug kapunungan nga nagorganisa sa pagtigom ug mga hinabang ug mapadala na ngadto sa mga lugar nga naapektohan sa kalamidad.

Aron mahimo kini, gikinahanglan nato ang pagsakripisyo gamay sa atong panahon, talento ug katigayunan, aron ang uban nga labi pang nanginahanglan karon, mabati nga wala sila gipasagdan. Anaa kita nga ilang mga kababayan ug kaigsoonan nga andam motabang kanila. Ang pagkamabination ug pagkamanggihatagon sa Pilipino, gipukaw ug gipakita na usab niining panahona. Gitawag nato kining Bayanihan, Damayan, Alay Kapwa, o Caritas. Dalaygon ang Dios nga nagdasig niini!

Ang atong Simbahang Katoliko sa Pilipinas, nagorganisa sa Nobena sa Pagampo ug Kalooy sugod sa Nob. 11-19. Adlaw-adlaw magaampo / magmisa alang sa mga nangamatay, mga nasamdan, ug alang sa mga banay nga nagbangutan tungod sa mga kapamilya ug kapuso nila nga nawala o nangamatay. Niining maong mga adlaw usab, gidapit ang tanan nga magtigom sa mga hinabang pinansiyal sa katawhan ug ilang mga hinabang nga makaon, ug ipasa kini sa ilang mga tagsatagsa ka Simbahan o sa pinakaduol ug pinaksayon nga relief center sa ilang lugar aron mapadala kini kanila ngananginahanglan niini.

Daghang salamat kaayo kaninyong tanan, sa inyong pagtagad ug kamanggihatagon. Dili kini hikalimtan sa mga mabulahan niini, ug labaw nang dili kini malimtan sa Dios nga naglantaw kanato sa kanunay.

“Sa pagkatinuod, sultihan ko kamo. Sa matag higayon nga inyo kining gibuhat sa labing ubos sa akong mga igsoon, inyo kining gibuhat kanako.”(Mt. 25:40)

Guillermo D. Afable
Obispo sa Diyosesis sa Digos
Nobiyembre 14, 2013