Paagi aron makalikay sa sakit?

Kung kita magkasakit, mopalit kita og medicina, ug mag-ampo. Daghang pag-ampo mas maayo. Hinonoa, dili mahimo nga masalig na lang kita sa mga medicina ug kutob na lang kita sa pag-ampo. Kinahanglan nga kita maghago ug magtuon (1) unsa ang atong buhaton aron makalikay sa mga sakit, ug (2) unsa ang atong buhaton aron dili mosamot ang atong sakit. Karon adunay mga pag-ampo aron maayo ang mga maskiton apan walay pagtudlo uns ang atong buhaton aron paglikay sa sakit o aron dili mosamot ang sakit.
Sa atong panahon, daghan na kaayo ang atong mabasa nga mga libro bisan sa mga mantalaan unsa ang mga pamaagi aron makalikay sa sakit o aron dili mosamot ang atong sakit. Sumala sa mga libro, daghan kaayo ang hinungdan sa mga sakit. Apan dili nato mahibaloan ang tanan kay ang salabutan sa tawo limitado. Busa hisgotan lang nato ang mahitungod sa (1) atong gina-kaon, ug (2) ang atong ginahunahuna.

(1)Pagkaon. Ang atong sakit mahimo nga ang kakulang sa mga nutrients nga gikinahanglan, o kaha subra ang mga nutrients tungod kay nagpatuyang kita og kaon – sa pagkaon nga atong nagustohan sama sa mga pagkaon nga matam-is ug tambok.

(2) Hunahuna – Sumala sa mga libro, ang mga hunahuna nga positive- sama sa pagtuo, paglaum, paghigugma, kaluoy, kalipay, makaayo sa lawas. Samtang ang kasuko, pagdumot, kasina, kahadlok, kaguol, kabalaka, kalagot , kaligutgot, pagmahay – kini mga negative nga panghunahuna nga makadaut sa lawas o moresulta sa mga sakit; ug kung dunay sakit, makapasamot sa sakit nga ang kahimtang- nagkinahanglan na og milagro.
Sa libro “The Heart of Healing” ni Ardy Roberto, ang iyang asawa naayo sa sakit nga lupus tungod sa medicina, sa pag-ampo, proper nutritions, ug positive thinking – ang masakiton nakapasaylo sa iyang inahan ang dugay na nga namatay. Di ba mao man kini ang gisugo sa atong Ginoo ug kanunay natong gilitok sa atong pag-ampo sa “Amahan namo?”

Ang dios mao ang nagbuhat sa tawo apan ang tawo mao ang nagtuon unsaon pagluto iyang pagkaon. Busa, dili mahimo nga kutob lang kita sa pag-ampo nga daw nagsugo o nagtudlo unsay buhaton sa Ginoo. Kinahanglan nga kita maghago ug walay katapusan ang atong pagtuon unsa ang atong buhaton aron paglikay sa mga sakit o kaha aron dili mosamot ang atong sakit.