Unang pari sa Malabog Parish gi-ordinahan

Dakong kalipay ang nakita sa mga parokyano sa San Roque Parish sa Malabog, Paquibato District, Davao City sa nahitabong ordinasyon sa pagka-pari ni Fr. Ronald Arcillas niadtong Disyembre 10.
Pinaagi sa pagtapion sa mga kamot ni Archbishop Romulo G. Valles sa ulo ni Fr. Arcillas, nadawat niya ang sakramento sa pagka-pari ug kini ang pinaka-unang higayon nga adunay gi-ordinahan nga diyosesanong pari sa Malabog Parish.

Mao usab ang unang higayon ni Abp. Valles nga mag-ordina og diyosesanong pari sa Archdiocese of Davao.
Kauban sa maong Misa ug rito sa ordinasyon ang Auxiliary Bishop sa Davao, Bp. George Rimando ug mga kaparian sa Archdiocese of Davao.

Sa iyang pulong-pasalamat, giingon ni Fr. Arcillas ang giingon kanila ni Bp. Antonieto Cabajog sa ilang annual clergy retreat diin ang asno (donkey) nga gisakyan ni Hesus nalipay tungod abi niya siya ang gisugat sa mga tawo nga nagdala og palma.

Giingon ni Fr. Arcillas nga bisan pa sa kalipay nga iyang gibati, siya sama lamang sa asno ug si Kristo mao ang rason sa kalipay nga gibati sa mga katawhan sa iyang ordinasyon ug dili siya. Subay usab kini sa tema sa iyang ordinasyon nga “Dili ako kondili si Kristo” sa Gal. 2:20.
Dugang usab niya, bisan pa siya sama sa asno, malipayon gihapon siya tungod misakay si Kristo kaniya.
Gipasalamatan usab niya ang mga kaparian nga midawat ug mitabang kaniya sa iyang pormasyon sa pagkapari.
Gihangyo usab niya ang mga katawhan ug mga kaparian nga i-ampo siya nga siya magmalig-on ug mamahimong buotan nga pari.