Ursuline sister mapasalamaton sa iyang Perpetual Profession

MATI CITY – Usa ka adlaw nga dili gayud malimtan ang ika-23 sa Nobyembre, 2013 alang kang Sr. Cholita R. Antonio, sa Order of St. Ursula (OSU) tungod kay kini ang adlaw sa iyang panumpa sa kinabuhing konsagrada hangtud sa hangtud kon Perpetual Profession Day atubangan sa katawhan sa Diyos alas 2:00 sa hapon sa San Nicolas de Tolentino Cathedral, sa siyudad sa Mati.

Si Most Rev. Patricio H. Alo, D.D., obispo sa Mati ang nanguna sa kasaulogan sa Eukaristiya, inubanan sa kapariang diyosesano ug relihiyoso, mga kamadrihan, ka-pamilya, kahigalaan, ug mga bisita, nga misaksi sa mga solemneng seremonyas sa presentasyon, pagbasa, paghalad, paglitok sa mga panaad sa pagtuo, mga piniling pag-ampo, litaniya sa mga santos, ug ang pagbasa ug pagpirma ni Sr. Cholita sa iyang formula for perpetual profession atubangan sa ilang Mother Provincial.

Si Sr. Cholita natawo sa Holy Cross, Manay, ubos sa San Ignacio de Loyola parish, niadtong Dec. 26, 1962, anak nila Felicisimo Antonio ug Natividad Ronquillo. Nag-eskuyla siya sa Maryknoll High School of Manay ug misulod sa Congregasyon sa Ursuline Sisters of the Canadian Union niadtong Sept. 8, 2005, ug nakauban sila si Sr. Aurore Jean ug Sr. Leonidesa Leong sa OSU Formation House sa Capitol Hill, Mati City.
Gibansay usab niya ang iyang mga nakat-onan sa Katesismo ug mga klase sa Teyolohiya sa pagtudlo sa mga kabataan sa palibot sa Capitol Hill, sa ilang Blessed Marie de l’Incarnacion Retreat Center, ug sa mga tulunghaang pampubliko sa Mati ug Davao. .

Nagpasalamat si Sr. Cholita, sa ngalan sa mga Ursuline Sisters, sa tanan nga mitambong ug mitabang kaniya sa katumanan sa iyang Perpetual Profession, labi na kang Obispo Patricio Alo ug mga paring mi-conselebrar sa Stos nga Misa, sa mga kamadrihan gikan sa managlahing congregasyon, kang Mother Provincial, Mo. Ryoko Akiyama, OSU gikan sa Japan ug ang OSU communities sa Mati ug Davao, pinangunahan sa iyang formator Sr. Leonidesa Leong, OSU nga nag-journey uban kaniya sukad pa sa postulancy, sa iyang mga ginikanan (+RIP), duha ka igsuon ug mga paryente gikan sa Holy Cross, Cebu ug Cagayan de Oro, ug sa mga nag-alagad sa altar ug miawit sa koro.

Ug labaw sa tanan ang pagpasalamat sa madre sa labing gamhanang Diyos sa iyang bililhong gasa sa bokasyon sa kinabuhing relihiyoso kon diin ang “perpetual profession usa ka concretong timaan sa maong gasa. Salamat sa Spiritu sa grasya sa Diyos nga akong gipaminawan ug gitubag. Gipanalanginan gayud ako kay bisan pa sa mga ups and downs sa akong kinabuhi, nagpabilin ako nga lig-on sa akong pagtuo nga ang dalan nga akong gipili naggikan sa unconditional love sa Diyos nga nag-ingon sa ebanghelyo ‘Ako ang nagpili kanimo’. Siya pud maoy nag-andam kanako sa pagtubag sa hagit sa pagpuyo sa karisma ni San Angela among pundadora sa komunidad Ursuline (sukad 1535)… Salamatay kamayo tanan!”

Gidalit ang usa ka en grande usab nga reception human sa liturhiya sa La-ne’s Kitaanan duol sa Catedral, kon diin gikahimut-an ang mga sari-saring bulok ug panagway sa mga souvenir rosary bracelets nga gipanghatag sa tanan.