Kamatayon, Pagkabanhaw, Assumption

1.     Sumala sa Biblia, “Kinahanglan mamatay ang tagsatagsa sa makausa, ug tapos niana hukman sa Dios.” (Heb. 9: 27) apan si Enoc (Gen. 5:24) ug si Elias wala mamatay (2Hari 2: 11). Dili malalis sa tawo kung dunay dili mamatay kay ang Ginoo dunay gahom sa pagbuot kung kinsa ang dili mamatay o magpabiling buhi (Jn. 21:23).

2.     Ang Ginoo nag –ingon nga ang mga nangamatay banhawon “sa kataposang adlaw”. (Jn. 6: 39,40,44,54) Hinonoa, sa dihang namatay ang Ginoo didto sa Krus, “” ang mga lubnganan nangaabli, ug gibanhaw ang kapid-an sa mga tawo sa Dios.” (Mt 27: 50-53)- nabanhaw sila nga wala pa moabot ang kataposang adlaw. (Wala isulti kung lawas ug kalag ba ang nabanhaw; ug wala pod isulti kung kinsa ang mga nabanhaw.) Dili pod malalis sa tawo kung dunay mabanhaw kay ang Ginoo nag-ingon nga Siya adunay gahom sa pagbuot kung kinsa ang Iyang banhawon (Jn. 5: 21) Si Moises namatay apan gituohang gidala ngadto sa Langit (Judas 9).

3.     Si Moises ug Elias nakig-sulti kang Jesus. (Mt. 17:3) Ang mga apostoles gi-ingnan sa Ginoo, “Sultihan ko kamo nga dili na gayod ako mousab pag-inom niining bino hangtod sa adlaw nga moinom ako sa bag-ong bino uban kaninyo didto sa Gingharian sa akong Amahan.” (Mt. 26.29)

Si Santa Maria dako ang kalabutan sa atong kaluwasan, Ang sala misulod sa kalibutan tungod sa pagdawat ni Eva sa mansanas, apan ang grasya – kaluwasan misulod sa kalibutan pinaagi kang Santa Maria. Sa iyang pagdawat nga ang Manluluwas nagpakatawo pinaagi kaniya. Gitagna nga “ang kaguol, sama sa hait nga espada, molagbas sa imong kaugalingong kasingkasing.” (Lk. 2:35), busa sa paghigugma sa Dios, wala nay makalabaw kaniya.

Kung gibanhaw ang daghang mga tawo, kung si Enoc ug si Elias wala mamatay, kung gituohan nga gidala ngadto sa Langit ang lawas ni Moises, nan, dayag na lang nga ang mga milagrong gihimo sa Ginoo ngadto sa ubang tawo, mas labi pa nga Iyang buhaton ngadto sa Iyang inahan kay ang Iyang lawas gikan man sa Iyang inahan ug ang iyang inahan nakatabang og dako alang sa kaluwasan sa kalibutan. Sa dihang gipahibalo si Santa Maria nga ang Manunubos magpakatawo pinaagi kaniya siya midayeg sa Dios, “Ug sukad karon ang tanang tawo motawag kanakog bulahan.” (Lk. 1:48) Ang tanang tawo nagtawag ba kang Santa Maria nga bulahan? Ang debosyon sa Santo Rosaryo mao ang katumanan sa sugo ug panagna sa atong Langitnong Inahan.