Bunyag o ang Kinabuhi sa Dios?

Sa Biblia mabasa, “ “motuo ug magpabunyag, maluwas” (MK. 16:16), “maghinulsol, ug magpabunyag” (Buh. 2: 38). Tungod niini, supak sila nga bunyagan ang bata kay kuno dili makahimo pagtuo ug paghinulsol. Kung dunay mosupak nga bunyagan ang bata, dunay duha ka pagtulon-an nga kinahanglan atong masabtan. Ang una (1), ang bata nagkinahanglan sa kinabuhi sa Dios. Ug ang ikaduha (2), ang bunyag mao paagi aron ang bata maka-ambit sa kinabuhi sa Dios.

Sa sambingay sa kombira sa kasal (Mt. 22: 1-14) ang tawong dinapit nga wala magsul-ob og bisti sa kasal gipapahawa ug gisilotan sa hari. Niini nga sambingay gipasabot nga ang tawo nagkinahanglan nga nagbaton sa grasyang makasantos o kinabuhi sa Dios aron siya makasulod sa Langit. Ang Ginoo nag-ingon, “ walay makasulod sa Gingharian sa Dios gawas kung matawo siya pinaagi sa tubig ug sa Espiritu (Jn. 3:5) Ang tawo dili makapuyo ilalum sa dagat kay kita dili isda. Kita dili makapuyo sa laing planeta kay ang kahimtang didto lahi sa kalibutan.

Ang bunyag mao ang gitukod ni Kristo nga paagi aron kita makabaton o maka-ambit sa kinabuhi sa Dios. “Nasayod kamo nga sa pagbunyag kanato nahiusa kita kang Kristo Jesus, ug busa nahiusa kita sa iyang kamatayon.—sa pagbunyag kanato gilubong kita uban kaniya ug miambit sa iyang kamatayon, aron ingon nga si Kristo gibanhaw —, kita usab magpuyo diha sa bag-ong kinabuhi. Kay kung nahiusa kita sa iyang pagkamatay, mahiusa usab kita kaniya kung banhawon na kita ingon nga gibanhaw siya. (Rom. 6:3-5)

Ang bata walay katakos nga motuo ug maghinulsol, apan kinahanglan nga siya bunyagan kay ang bunyag mao ang paagi aron ang bata mahiusa kang Kristo, mahiusa sa Iyang kamatayon, ug kung mamatay makasulod sa Langit ug mabanhaw sa kataposang adlaw (Jn. 6:38-54). Ang bata dili kinahanglan pangutan-on kung gusto ba niya ang sinina o gatas. Dili kinahanglan pagngutan-on ang bata kung gusto niya ang kinabuhing dayon pinaagi sa bunyag. Busa, ang pagtuo ug paghinulsol gikinahanglan alang sa mga hamtong kay makahimo sila pagdawat o pagbalibad, ug dili mapugos.

Ang parte sa Ginoo aron kita makabaton sa kinabuhing dayon mao ang pag-ula sa Iyang dugo ug paghatag sa Iyang kinabuhi. Ang atong parte mao ang pagdawat sa sacramento sa bunyag. Kung dili nato pabunyagan ang bata, sama ra nga gisalikway nato ang paagi nga gitukod sa Ginoo, ug kung ang bata mamatay nga wala pa mabunyagi sama ra nga moingon kita nga ang Dios na ang mangita og paagi aron ang bata makadawat sa kinabuhi sa Dios. Busa, ang mga hamtong mao ang modala sa mga bata ngadto sacramento sa bunyag aron sila makadawat sa kinabuhi ni Kristo.