Ang Bokasyon Sa Mga Layko

P: Unsa man ang bokasyon sa mga laykong matuohon?

T: Ang mga laykong matuohon kinahanglan isip ilang kaugalingong bokasyon mangita sa Gingharian sa Dios pinaagi sa pagdan-ag ug paghan-ay sa mga kalibotanong gimbuhaton sumala sa plano sa Dios. Niining paagiha ilang gituman ang ilang tawag sa pagkabalaan ug sa apostolado, usa ka tawag nga gihatag alang sa tanang mga binunyagan.

P: Unsaon man sa mga laykong matuohon sa pagsalmot diha sa parianong tahas ni Cristo?

T: Misalmot sila niini ilabina diha sa Eyukaristiya pinaagi sa paghalad ug espirituhanong sakripisyo nga “makapahimuot sa Dios pinaagi ni Jesucristo” (1Pedro 2:5) sa ilang kaugalingong kinabuhi uban sa tanan nila nga buhat, sa ilang mga pag ampo, sa ilang mga apostolikanhon nga lihok, sa ilang kinabuhi sa banay, sa ilang adlaw-adlaw nga buhat ug mga kalisdanan nga mapailobon nilang gipas-an apil na ang ilang nasinating kahupayan sa espiritu ug lawas. Niining paagiha, bisan ang mga layko, linaing gihalad ngadto kang Cristo ug gikonsagrahan pinaagi sa Espiritu Santo, nagahalad sa kalibotan mismo ngadto sa Dios.

P: Unsaon man pagsalmot sa layko sa propetanhong tahas?

T: Nagasalmot sila niini pinaagi sa makanunayong pagdawat diha sa pagtoo sa Pulong ni Cristo ug sa pagpadayag niini ngadto sa kalibotan pinaagi sa pagsaksi sa ilang mga kinabuhi, ilang mga Pulong, ilang ebanghelikanhong lihok, ug pinaagi sa katekesis. Kining ilang lihok nga ebanghelikanhon nakaangkon ug talagsaong kamabungahon sanglit gipatuman man kini diha sa kasagaran nga mga kahimtang sa kalibotan. (cf. Kompendiyo Sa Katekismo Sa Simbahang Katoliko, 188-190)