Katawhan Mokaon sa Lawas

Ang mga Kristianos gitawag “katawhan sa Dios” (Col. 3:12; 1 Ped. 4:17) apan wala magkahiusa ug hangtod karon adunay panagsumpaki. Kasagaran ang ginalantugi-an mao ang mga doktrina, pagtulon-an, pagtuo ug mga paagi apan dili ang labing hinungdanong sugo alang sa atong kaluwasan. Unsa ba ang kinahanglan tun-an diha sa Biblia? Ang Ginoo nag-ingon,

                “ Kinahanglan higugmaon mo ang Ginoo nga imong Dios…. Ang sunod nga labing hinungdanong  sugo mao kini: Higugmaa ang imong isigkatawo sama sa imong kaugalingon.’ Wala nay sugo nga labi pang hinungdanon kay niining duha.” (Mk. 12:30-31)

Si San Pablo nag ingon, “ Bisag may hiyas ako– ug makabaton sa tanang kahibalo ug makasabot sa tanang tinago; bisag may pagtuo ako nga makapabalhin sa mga bukid-apan kung wala akoy gugma, wala akoy kapuslanan. Bisag ipanghatag ko pa ang tanan—ug ipasunog ang akong lawas, apan kung wala akoy gugma, wala kini kapuslanan.” (1Cor. 13:2-3) Si San Juan apostol nag-ingon, “ Ang wala mahigugma sa iyang isigkatawo wala makaila sa Dios, kay ang Dios gugma man.” (1 Jn. 4:8) Ang atong Ginoo nag-ingon, “ Maghatag ako kaninyog bag-ong sugo: paghigugmaay kamo. Ingon nga ako nahigugma kaninyo, paghigugmaay usab kamo. Kung maghigugmaay kamo, mahibalo ang tanan nga kamo akong mga tinun-an.” (Jn. 13:34-35)

Ang mga tinun-an ni Kristo mao ang katawhan sa Dios – ang Simbahan. “Ang Simbahan mao ang lawas ni Kristo, ang kahingpitan niya nga mao ang naghingpit sa tanang butang.” (Ef.1:23)Si Kristo mao ang ulo sa Simbahan nga Iyang lawas (Col.1:18). Ang mga tinun-an ni Kristo sakop o bahin sa Iyang lawas (1Cor. 6:15)

Ang mga sakop sa lawas ni Kristo kinahanglan mokaon sa Iyang lawas (Jn. 6: 35-58). Busa, “Samtang nangaon sila mikuha si Jesus sa pan,–ug gihatag sa iyang mga tinun-an. “ Dawat ninyo kini ug kan-a, miingon siya::” Kini ang akong lawas.” (Mt. 26:26) Si San Pablo nag-ingon, “ Kay nadawat ko gikan sa Ginoo ang pagtulon-an nga akong gitudlo kaninyo: nga ang Ginoong Jesus,– mikuha sa pan—ug miingon: “ Mao Kini ang akong lawas nga gitugyan alang kaninyo. Buhata kini aron paghandom kanako.” (1Cor. 11:23-24)

Ang paghigugmaay mao ang labing hinungdanon ( Mk.12). Tungod sa Gugma si Kristo gihatag sa Iyang Amahan. Tungod sa gugma, gihimo ni Kristo ang paagi aron kita makakaon sa Iyang lawas ug Siya magpabilin ug makig-uban kanato samtang ang Simbahan nagalakbay padulong sa Iyang kahingpitan. (Ef. 1:23)