Si Kristo, Dios o Tawo?

Sumala sa Biblia, Dios lang ang atong simbahon ug alagaran. Busa dili simbahon ang dili Dios. (Mt. 4:9-10). Si Kristo gisimba ug wala Niya idili ang pagsimba Kaniya. Busa, ang pagdawat ni Jesus sa mga nagsimba Kaniya nagmatuod nga Siya Dios. Gani, bisan ang mga anghel sa Dios kinahanglan mosimba kang Jesus (Heb. 1:6). Kung sila dili motuo nga Dios si Kristo, nan, dili sila mosimba kang Kristo. Labaw pa diay sila kay sa mga anghel? Kung sila moingon nga si Jesus tawo lang apan nagasimba sila kang Jesus, nan, gisupak pod nila ang Biblia kay nahasulat man nga ang Dios lang ang atong simbahon (Mt. 4:9-10, Gipa. 19:10).

Si San Pedro miingon kang Cornelio, “ayaw akog simbaha kay tawo lamang ako.” (Buh. 10:26). Sa laing hitabo, si Juan mihapa aron pagsimba sa anghel, apan ang anghel miingon, “Ayaw kini buhata! Sulugoon lamang ako sama kanimo. Maoy simbaha ang Dios!” (Gipa. 19:10) Gisulti sa anghel “maoy simbaha ang Dios.” Tungod kay Siya Dios, si Kristo gisimba bisan bata pa (Mt. 2:2,11); si Kristo gisimba sa Iyang  mga tinun-an (Mt. 14:33); si Kristo gisimba human Siya mabanhaw (Mt. 28:9,17).

Si San Pedro ug ang anghel wala musugot nga sila simbahon. Ang anghel nag-ingon, “Maoy simbaha ang Dios.” Si Kristo gisimba ug wala Niya idili ang pagsimba Kaniya. Kung ang pulong “pagsimba” nagmatuod sa pagka Dios ni Kristo, nan, malagmit nga kini tuison o usabon sa mga Biblia sa ubang mga sekta.

Unsa man ang dangatan sa mga tawo nga dili motuo nga Dios si Kristo? Si Kristo mao ang maghukom. “Kinahanglan mamatay ang tagsa-tagsa sa makausa, ug tapos niana hukman sa Dios.” (Heb. 9:27) “Moatubang kitang tanan sa Dios aron hukman niya.” (Rom. 14:10) Ang Biblia nag-ingon, “Kay kinahanglan moatubang kitang tanan kang Kristo aron Iyang hukman…” (2 Cor. 5:10) “Ang katapusang paghukom unya na himoa sa pag-abot sa Ginoo,… (1 Cor. 4:5) Giingon nga hukman kita sa Dios. Pag-abot ni Kristo moatubang kita Kaniya. Ang maghukom kanato Dios kay si Kristo Dios ug Tawo nga matuod.

Ang Dios usa lang apan dunay tulo ka Personas. Ang ikaduhang persona-ang Anak sa Dios—nagpakatawo—miambit og lawas gikan kang Santa Maria (Jn. 1:1,14) Ang gipanganak ni Maria nga si Jesus maoy usa lang ka persona (Divine Person) apan dunay duha ka kinaiya (Natures: Dios ug Tawo nga matuod, busa si Jesus Son of God and Son of Man).