Si Moises ug ang biyuda

Sa sambingay (Lk. 18), may usa ka biyuda nga gitabangan sa usa ka maghuhukom tungod kay- ang biyuda nagbalikbalik pag –adto ug paghangyo sa maghuhukom. Mahitungod niini nga sambingay, nahinumdom ako sa usa ka pangutana kung mausab ba diay nato ang hunahuna sa Dios pinaagi sa atong pagbalikbalik sa “ Maghimaya ka Maria” diha sa Santos nga Rosaryo?

Ang sambingay wala magtudlo nga ang Dios sama sa maghuhukom. Gani ang maghuhukom walay pagtuo sa Dios ug walay pagtahod sa mga tawo. Ang sambingay nagtudlo kanato “ nga kinahanglan kita nga mag-ampo ug dili gayod mawad-an sa paglaom.” Si Moises (Ex. 17:11-12), samtang nakig-away sila sa mga Amalekites nagpataas sa Iyang duha ka kamot aron pag-ampo apan kung dili niya ipataas ang iyang mga kamot tungod sa kakapoy, malupigan sila. Busa, imbis si Moises magbalikbalik pagpataas sa iyang kamot, ang ilang gihimo mao ang pagbutang og lingkuranan kang Moises ug si Aaron ug Hur mao ang nagagunit sa mga kamot ni Moises aron padayon siya sa pagpataas sa iyang mga kamot. Ang kakapoy wala himoang rason aron Si Moises mohunong sa pagpataas sa kamot; ang kakapoy wala mahimong higayon aron si Moises pulihan ni Aaron ug Hur diha sa pag-ampo.

Busa dili kita patintal sa mga limbong nga ang pagbalikbalik sa Maghimaya ka Maria supak sa kabubut-on sa Dios. Hinumdomi, nga ang Ginoo nagpakamatay ug nahigugma sa tanan, apan diutay lang ang Iyang mga gipili. Aron gamiton nga mga instrumento mga tawo alang sa mga bulohaton nga buot Niyang ipadayon.

May mga panahon nga napakyas kita sa pag-ampo sa Santos nga Rosaryo. Usahay kapoy ang pag-ampo. Apan sama kang Moises ug sa babaye nga biyuda, kinahanglan nga mopadayon kita kay sa atong pagpadayon, malagmit nga kini nagtima-ilhan nga kita apil sa mga gipili nga instrumento aron pagpadayon sa bulohaton sa Ginoo ug sakop kita sa mga tawo/kaliwat nga gihisgutan ni Santa Maria, “ Ug sukad karon ang tanang tawo motawag kanako nga bulahan.” (Lk. 1: 48)

Busa kung kita nagtinguha nga kita pulihan sa atong pag-ampo sa Santos nga Rosaryo, nan, sama ra nga nagtinguha kita nga mamatay na!