Bunawan Vicariate, Positibong Musuporta sa Pag-abli sa Radyo

Uban ang kaparian nga nahisakop sa Bunawan Vicariate gikan sa St. Joseph Parish, Sasa Fr. Diony Tabiliran, Fr. Leif Simbajon, ug Fr. Mervin Maglana, Military Ordinariate sa Camp Panacan, Fr. Cirilo “Lolong” Bermudez, San Miguel Parish Panacan, Fr. Proseso “Jhun” Gimeno, St. James Parish, Bunawan, Fr. Rommel Banilad, St. John the Baptist, Lasang Fr. Arnulfo “Pong” Cubero, miatubang ang media apostolate research team niadtong Hunyo 16 sa binulang tapok sa maong vicariate.

Ang Davao Verbum Dei Media Foundation, Inc. pinangunahan ni Abp. Romulo Valles, human mihatag of suporta sa mga miyembro sa radio team sa BOT meeting niadtong Hunyo 14 mipadala usab sa team aron pagkuha sa pulso dili lang sa katilingban apan apil na sa mga kaparian sa mga detalye nga nahisubay sa Radio Opening Business Plan.

Ang presentasyon nga nahitabo atubangan sa mga pari maoy ikaduha human sa Presbyterium meeting niadtong Abril sa kasamtangang tuig.

Layon sa pagpadayag sa Bunawan Vicariate nga masusi ang uban pang mga pamaagi sa pagtabang sa mga parokya aron mapalahutay ang operasyon sa Katolikong Radyo kung ugaling kini pagaablihan.

Unang gipasabot sa team ang mga rason kung nganong nasirad-an kini sa ikatulong higayon niadtong 2008 gikan sa unang pag abli niini niadtong 1987.

Misunod ang pagyagyag sa sulod sa Business Plan, dayon ang Programming nga nalatid base sa Media Survey diin 1,000 ang nagpartisipar gikan sa mga parokya, eskwelahan ug lay movements.

7M START-UP CAPITAL

Ang computation sa pag-abli uban ang pagpalit sa bag-ong transmitter, pagpasweldo sa bag-ong mga empleyado ug uban pang galastuhon, mukabat sa 7 milyon isip start-up capital.

Matud pa ni Fr. Pong Cubero, “Dili problema ang kwarta sa sugod kundili ang sustainability ug pamaagi sa mga tawo sa sulod.”

Iyang gisugyot nga p’wedeng makahulam sa mga parokya ug kwarta ug iuli lang kini nga walay interest human ang usa ka tuig.  “Ayaw lang pud padugaya, iuli ang gihuwaman.”

Usa pa ka tabang nga mahatag sa mga parokya mao ang pagpahigayon og Second Collection.    Dugang suporta, miingon ang mga pari sa Bunawan Vicariate nga andam usab sila magpakolekta alang sa pagpadagan sa radyo.

Pipila ka sugyot pa ang gihatag sa grupo sama sa paghulam ug k’warta sa media apostolate sa Archdiocese, aron walay interest.

TEST BROADCAST SA SEPT. 8

“Kay tungod naa may target date of test broadcast karong September 8, mamahimo usab nga mu-tap ug investors nga mupahulam ug kwarta aron sama didto sa Sto. Rosario Parish, masugdan na, n’ya hinay-hinayan lang ug bayad samtang gadagan ang operasyon sa radyo,”  matud pa ni Fr. Dionisio Tabiliran.  “Klaruhon usab ang polisiya sa pagdawat ug mga advertisements apil ang identity sa radyo.”  Gipaambit usab niya ang usa ka kasinatian sa Radio Mass listener nga taga Nabunturan diin nanghinaut nga madunggan usab iyang homiliya sa radyo.

MEDIA POINT PERSONS

Nakit-an usab nga importante ang presensya sa mga media point persons diha sa mga GKKs ug parokya alang sa pag-promote ug pag-pangolekta sa mga donasyon.

Sa mga programa nga napresenta, nanghinaut ang mga pari sa Bunawan Vicariate nga pakusgan ang programa sa pagpasabot sa Katolikong pagtoo, Saint of the Day, ug counseling on-air.

Nanghinaut pud ang tanan nga mabayran anam-anam ang payables hilabi na sa National Telecommunications Commission (NTC).  Sa pagsarado sa DXGN niadtong 2008, mikabat sobra 500,000 na ang fines ug penalties.

Karon, tungod sa panabang sa Catholic Media Network (CMN), ginapahingusgan gihapon niini nga i-follow-up ang mga papeles sa pag abli aron padayon nga atong makuptan ang frequency nga 89.9 sa FM band.  Importante kini tungod kay ang NTC ang nagahatag ug lisensya aron makapadagan ug usa ka radio station.

Apan bisan pa man sa obligasyon sa atong radyo sa NTC, positibo gihapon ang tanan nga makabayad ra sa hinay-hinay kon muabli lang ang Katolikong radyo.

“Makab-ot nato ning tanan (maximum potential income) depende sa atong paningkamut.  Dili lang kini amua, atua kini.  Magbutang lang kita ug tamang sistema sa pagpadagan sama sa paghimo ug Operations Manual ug Marketing Incentive Scheme,” panapos ni Inday Banquerigo, volunteer  CPA nga mipresenta sa Business Plan.

Ang Bunawan Vicariate usa lamang sa 7 ka Vicariates sa Archdiocese of Davao.

Sunod nga atubangon sa grupo mao ang uban pang vicariates, ang grupo sa lay leaders nga ACLAIM (sa ikaduhang higayon), mga Directors sa Pastoral Agencies ug tigum sa mga pari kon presbyterium.