“Dili sayon magpuyo sa kumbento sa 25 ka tuig”

Sumala sa usa ka madre nga nagsaulog sa 25 ka tuig sa iyang pagka-miyembro sa Teresian Daughters of Mary (TDM) dili sayon nga magpuyo sulod sa kumbento sukad kaniadto nga una siyang naabot sa maong kongregasyon.

Sumala ni Sr. Ma. Marilyn Cayapos, TDM sa pagsulod niya sa TDM Sisters, dili sayon ang iyang naagian tungod wala siya kahibalo kung kinsa ang iyang makauban sa pormasyon ilabi na nga gikan silang tanan sa nagkalain-laing pamilya ug gigikanan.

Bisan pa man sa kalisdanan nga iyang naagian, malipayon gihapon siya ug gibati niya nga gihigugma siya sa Ginoo sa iyang pagsaulog sa silver jubilee isip TDM Sister niadtong Mayo 31.

Si Archbishop Romulo G. Valles, Arsobispo sa Dabaw ang nangulo sa Misa isip pagpasalamat sa gasa sa bokasyon sa pagka-madre. Kauban sa maong kasaulogan ang pipila ka mga kaparian.

Gikalipay usab ni Sr. Cayapos ang presensya sa iyang mga ginikanan nga bisan sa ilang balatian, nakatambong gihapon sila sa talagsaong okasyon sa iyang kinabuhi isip madre.

Sa pagkakaron si Sr. Cayapos mao ang Directress/Principal sa Maryknoll High School of Manay, sa Manay, Davao Oriental.

RENEWAL OF VOWS

Dako ang kalipay sa TDM Sisters nga duha sa ilang kaigsoonan ang nag-renew sa ilang vows of poverty, obedience and chastity atubangan sa ilang Regional Superior Sr. Ma. Gertrudes Neri, TDM sulod sa misa nga gisaulog ni Abp. Valles niadtong Mayo 30.

Si Sr. Ma. Rosario Infiesto, TDM ug Sr. Ma. Vanessa Verano nag-renew sa ilang religious vows. Ang ilang renewal of vows maoy pagpangandam sa umaabot nga perpetual profession of vows sa umaabot nga tuig.

Sulod sa maong Misa, gihimo usab ang pagdawat isip bag-ong Novice ni Sr. Charlyn Mamotho nga taga-Asuncion, Davao del Norte, human siya nipasa sa Postulancy period sa TDM Sisters. Gidawat niya ang habit ug ang belo isip Novice sa religious congregation. (@dcheraldjohnfrances)