Divine Cosplay gihimo sa Youth Ambassadors Night sa Agdao

Aron ipakita ang talento ug mga maayong natun-an sa mga batan-on nga naggikan sa mga Gagmay’ng Kristohanong Katilingban (GKK), gipahigayon sa San Antonio de Padua ang mga Youth Night diin gihimo ang contest sa mamahimong Youth Ambassador.

Ang Youth Night gipahigayon niadtong Hunyo 7 sa Holy Cross of Agdao covered court.

Walo ka pares gikan sa nagkalain-laing zona sa GKK sa parokya ang mipakita sa ilang talento sa paghimo ug pag-rampa ug mga eco-creative costumes gamit ang mga recycled materials. Kini gihimo aron mahatagan og pagtagad sa mga kabatan-onan ang kabililhon sa pag-amping sa kinaiyahan.

Kabahin usab sa contest ang Divine Cosplay diin gihulagway sa mga kabatan-onan ang mga inila ug wala kaayo mailhi nga mga santos sa Simbahan.

Gihimo usab ang cocktail attire competition ug nagpakita usab sila sa ilang mga kahanas sa pagtubag sa mga pangutana nga naay kalambigitan sa pag-atiman ug preserbar sa kinaiyahan.

“Ang mga batan-on diay dili lang sa mga kalipay ug activities gawas sa Simbahan. Involved usab diay sila sa Simbahan. Nasayod sila sa mga santos ug ang mga batan-on Diosnon,” kini sumala sa kura paroko nga si Fr. Leonie España.

“Hinaut kini inyo gihimo mahimong inspirasyon ngadto sa uban ug nagpadayag nga si Kristo anaa sa inyo kinabuhi,” dugang ni Fr. España.

Midaug ang representante sa Zone 7 ug Zone 1 nga sila si Ritchie Sugawara ug Cristine Joy Arquillo ug sila kauban ang mga pares sa 4th hangtud 1st runner-up mamahimong kabahin na sa core group sa parish youth apostolate sa San Antonio de Padua Parish, Agdao. (@johnfrancesf)